Բազմանում են ԳԱԻ-ի ակտերը, բազմանում…

2012թ. դեկտեմբերի 21-ին Ապերյան Արմենակը իր VAZ 21213 մակնիշի 07LO202 համարանիշի ավտոմեքենան կայանում է Շախմատի տան մոտակայքում և մտնում հարակից սրճարան: Անցնում է մոտավորապես մեկ ամիս, և 2013թ. հունվարի 16-ին գալիս է «սև թուղթը»: Հենց այդ ժամանակ էլ Արմենակը տեղեկանում է, որ կայանել է անթույլատրելի վայրում. հիշյալ հատվածում տեղադրված է արգելման նշան, որով մի ուղղությամբ կայանված ավտոմեքենաները «պլստում են» տուգանվելուց, մեկ այլ ուղղությամբ կայանվածները` ենթարկվում 5000 դրամ վարչական տույժի:

Արմենակն, իհարկե, որպես Հայաստանի Հանրապետության օրենքները հարգող, Ճանապարհային ոստիկանության արձանագրած իրավախախտումներին ամենայն պատասխանատվությամբ վերաբերվող քաղաքացի` առանց այլևայլության ընդունում է իր մեղքը, մեկընդմիշտ ֆիքսում, որ հիշյալ հատվածում կայանելը փորձանքի պես մի բան է, և գնում տուգանքը մուծելու:

Էլի որոշ ժամանակ է անցնում, և, հանկարծ, Արմենակենց տուն դարձյալ «սև թուղթ» է «ներխուժում»: Բովանդակությունը` էլի՛ չարաբաստիկ դեկտեմբերի 21-ը, էլի՛ նույն` Խանջյան-Սայաթ Նովա խաչմերուկի հիշյալ հատվածում կայանումը: Եթե վարչական իրավախախտման առաջին` թիվ 1200411812 որոշում ընդունողը տեսուչ Կարեն Աղաջանյանն էր, ապա երկրորդ` 1200411817 որոշման հեղինակն արդեն մեկ այլ անձնավորություն էր` տեսուչ Կոստանտին Կոստանյանը: Տեսուչ Աղաջանյանն իրավախախտումը ֆիքսել էր ժամը 21:19-ին, տեսուչ Կոստանյանը` 21:35-ին: Վարչական իրավախախտման տեսակը` նույնը, տուգանքի գումարը` ևս:

Առաջին իրավախախտման լուրը մեր իրավախախտ վարորդը, ինչպես և տուգանվող բոլոր մյուս վարորդները, իհարկե, ինչ-որ տեղ ափսոսանքով, դժկամությամբ էր ընդունել: Բայց ահա երկրորդը ստանալուց հետո Ապերյան Արմենակը մոռացավ, թե ինչ բան է հանգիստ քունը, և մշտական զգացողությունը, որ առաջանում է մեր իրավախախտ վարորդի մոտ ամեն անգամ դուռը թակելիս կամ փոստատար տեսնելիս, սարսափն է, հատկապես, երբ Արմենակը հիշեց, որ այդ օրը ընկերների հետ մոտավորապես մի 4 ժամ անցկացրել է հիշյալ սրճարանում, այսինքն` մոտավորապես 4 ժամ իր ավտոմեքենան կայանված է եղել հիշյալ վայրում:

Արմենակի հաշվարկներով՝ եթե ԳԱԻ-ի տեսուչները հիշյալ իրավախախտման որոշումներն ընդունել են 15 րոպեի տարբերությամբ, ապա 4 անգամ 60, բաժանած՝ 15, կնշանակի՝ սպասվում են ևս 14 նույնաբովանդակ որոշումներ… Երկուսը ստացվել են իրավախախտումից մոտ մեկ ամիս հետո՝ մի քանի օրերի տարբերությամբ, մյուսները՝ դե՛...2013-ը դեռ առջևում է, ԳԱԻ-ի տեսուչների պակաս էլ ԳԱԻ-ում, բնակաբանար, չկա, և ուրեմն, տարբեր անուն ազգանուններով տարբեր ժամերի ու րոպեների ընդունված որոշումների պակաս էլ կարող է չլինել:

ՀԵՏԳՐՈՒԹՅՈՒՆ 1

ՀՀ ոստիկանապետ Վլադիմիր Գասպարյանի ամենասիրված ռեպլիկներից մեկը՝ «բազմանում են սրիկաները, բազմանում են…»-ն էր: Ճանապարհային ոստիկանությունում շեֆի ռեպլիկը, ըստ երևույթին, այնքան է դուր եկել, որ որոշել են շատ յուրահատուկ ձևով այն կիրառության մեջ դնել՝ «բազմացման» պրոցեսը տեղափոխել ակտերի վրա՝ այդ կերպ փորձելով մեկընդմիշտ արմատախիլ անել իրավախախտ վարորդների մեջ գիտակցաբար կամ անգիտակցաբար իրավախախտում անելու երևույթը:

Ի դեպ, պետք է ասել, որ ԳԱԻ-ի հիշյալ «նորամուծությունն» այնքան էլ անարդյունավետ չէ. դժվար է հավատալ, որ սխալ կայանման համար միանգամից տասից ավելի իրավախախտման որոշում ստացող որևէ վարորդ դրանից հետո էլի, թեկուզ մի անգամ, համարձակվի նստել ղեկին, առավել ևս՝ կայանել անթույլատրելի վայրում:

ՀԵՏԳՐՈՒԹՅՈՒՆ 2

«Կարգին հաղորդման» սկետչերից մեկում՝ «Պապայություն», ծննդաբերական բաժանմունքում սպասող ապագա հայրիկին բժիշկը րոպեների տարբերությամբ ազդարարում է, թե հերթական երեխան է ունեցել՝ ամեն անգամ քաջալերելով վերջինիս «պապայություն», «мать- героиня, отец-героин» վանկարկումներով: 4-րդ, 5-րդ, իսկ հետո՝ արդեն 6-րդ երեխայի վրա հայրիկի նյարդերն արդեն տեղի են տալիս, նա ներխուժում է ծնարան և սարսափած բղավում՝ «լույսերն անջատե՛ք, սրանք լույսի վրա են գալի…»:

Երևի մեր փառապանծ ԳԱԻ-ի ակտերն էլ 2013-ին որոշել են «լույսի վրա գալ, գալ ու գալ…»:

Լուսինե Կեսոյան