Կայացել է Բելառուսի գրքի միջազգային 20-րդ հոբելյանական ցուցահանդեսը

2013 թ. փետրվարի 4-10-ը Մինսկում ՀՀ մշակույթի նախարարության Գրքի և հրատարակչական գործի կենտրոնի տնօրեն Էդուարդ Միլիտոնյանի գլխավորած պատվիրակությունը մասնակցել է Բելառուսի գրքի միջազգային 20-րդ հոբելյանական ցուցահանդեսին: Հայկական տաղավարը ներկայացրել է վերջին տարիներին Հայաստանում հրատարակված պատմական, գեղարվեստական, մանկական, վավերագրական, թարգմանչական, ալբոմային գրականություն և տեսա-ձայնասկավառակներ: Շուրջ 200 անուն պետական պատվերով և աջակցությամբ հրատարակված գրքերից բացի ցուցահանդեսին ներկայացվել են նաև «Անտարես», «Զանգակ», «Էդիթ փրինթ» և «Երևան փրոդաքշընս» հրատարակչությունների 60 անվանում գրքեր: Գրքերի շնորհանդեսին մասնակցել են Բելառուսի և այլ երկրների գրողներ, հրատարակիչներ, գրատարած ցանցի ներկայացուցիչներ: Տեղի են ունեցել նաև հանդիպումներ Մինսկի հայ համայնքի անդամների և Մինսկում հրատարակվող «Անիվ» հանդեսի խմբագրակազմի հետ: Ցուցահանդեսի շրջանակում հայկական տաղավարը հյուրընկալել է Կիևում տպագրված «Գրչի գաղտնիքը» անթոլոգիայի թարգմանիչ Ալեքսանդր Կանոնենկոյին: Նշված անթոլոգիայում հինգ այլ երկրների բանաստեղծների հետ ընդգրկված են նաև հայ դասական և ժամանակակից բանաստեղծների գործեր: Հայկական պատվիրակությունը շահագրգիռ քննարկում է ունեցել Մինսկի «Զվեզդա» հրատարակչության տնօրինության հետ՝ ռուսերեն լեզվով հայ-բելառուսական միացյալ անթոլոգիայի հրատարակման վերաբերյալ: Այն լինելու է Մինսկում հրատարակվող 10 այլ երկրներին նվիրված գրքի նախագծերից մեկը:Ցուցահանդեսի ավարտին ներկայացված գրքերը հանձնվել են Բելառուսի Հանրապետությունում Հայաստանի Հանրապետության դեսպանությանը: