«168 ժամ». Մարդիկ Ազատության հրապարակում էին ոչ թե հանուն Րաֆֆի Հովհաննիսյանի, այլ՝ ընդդեմ իշխանության

Երեկ Ազատության հրապարակում մեկնարկած նախագահի թեկնածու, «Ժառանգության» առաջնորդ Րաֆֆի Հովհաննիսյանի կողմնակիցների հանրահավաքի բազմամարդությունն այնքան անսպասելի էր, որքան փետրվարի 18-ին նրա ստացած ձայների քանակը: «168 ժամը» առաջնորդողում գրում է, որ Ազատության հրապարակում էին ամենատարբեր խավերի, քաղաքական ամենատարբեր նախասիրությունների տեր քաղաքացիներ, որոնց զգալի մասը գուցե անգամ չի համակրում Րաֆֆի Հովհաննիսյանին: Այնպես, ինչպես, ի դեպ, հանրահավաքի հարթակ բարձրացած ու Րաֆֆի Հովհաննիսյանի կողքին կանգնած գործիչների մի մասը: Երեկվա հանրահավաքը փետրվարի 18-ի ընտրությունների շարունակությունն էր, մարդիկ Ազատության հրապարակում էին ոչ թե՝ հանուն Րաֆֆի Հովհաննիսյանի, այլ՝ ընդդեմ իշխանության: Րաֆֆի Հովհաննիսյանն իր համակիրների հետ այսօր գիշերել է Ազատության հրապարակում: Նա հայտարարել է, որ այսօր սպասում է Սերժ Սարգսյանին, սպասում է, որպեսզի վերջինս գա, հանձնի իշխանությունը ու շնորհավորի իրեն, կամ, ինչպես Րաֆֆի Հովհաննիսյանն է ասում՝ շնորհավորի ժողովրդին՝ տարած հաղթանակի կապակցությամբ: Այս պահանջն, իհարկե, անիրատեսական է, որն առայժմ անհասկանալի է դարձնում Րաֆֆի Հովհաննիսյանի պայքարի շարունակության տրամաբանությունը: Որևէ մեկը չգիտի, կամ նրանք, ովքեր գիտեն՝ չեն ասում, թե ի՞նչ է անելու Րաֆֆի Հովհաննիսյանը, եթե հանկարծ Սերժ Սարգսյանը չգնա Ազատության հրապարակ... Րաֆֆի Հովհաննիսյանը լուրջ պատասխանատվություն է կրում ոչ միայն ու, գուցե, ոչ այնքան իր պայքարը շարունակելու հարցում, այլ դրա տապալման դեպքում՝ ապատիայից կարծես արթնացող հասարակության կանխատեսելի հուսալքության համար: