Reuters գործակալությունն անդրադարձել է Ազատության հրապարակի ցույցերին

Չորեքշաբթի օրը շուրջ 5,000 ցուցարար էր հավաքվել Ազատության հրապարակում և բողոքարկում էր ՀՀ նախագահ Սերժ Սարգսյանի վերընտրվելը, որն ուղեկցվել է խարդախություններով: Այս մասին հաղորդում է Reuters գործակալությունը: 

Ցուցարարները մասնավորապես նշում էին, որ իրենց քվեաթերթիկներն անվավեր են ճանաչվել և դատապարտում էին այլ բռնություններ: 

«Դուք պատրաստ եք մնալ այստեղ մինչ հաղթանակը»,-ասել է Րաֆֆի Հովհաննիսյանը` դիմելով հավաքված մարդկանց և ավելացրել, որ սահմանադրությունը պետք է հաղթի խարդախություններին: 

Հովհաննիսյանի շատ կողմնակիցներ նշել են, որ ցույցերը շարունակվելու են մինչև Սերժ Սարգսյանի տապալումը, սակայն ամբոխը ցրվեց 3 ժամ անց՝ առանց որևէ բռնության: Որոշ ցուցարաներ նշել են, որ կրկին հավաքվելու են հինգշաբթի օրը:

Հովհաննիսյանը պարզ կերպով չի նշել, թե արդյոք պատրաստվում է պաշտոնապես բողոքարկել երկուշաբթի օրը տեղի ունեցած ընտրությունները, որոնցում գործող նախագահ Սերժ Սարգսյանը հավաքել էր 58,6%, իսկ ՀՀ առաջին ԱԳ նախարար Րաֆֆի Հովհաննիսյանը՝ 37% ձայն: 

Միջազգային դիտորդները առաջընթաց են արձանագրել՝ համեմատած 2008 թվականի ընտրությունների հետ, սակայն նաև նշել են, որ իրական մրցակցություն չի եղել: 

Օտար պետությունները և ներդրողները շահագրգռված են, որ Հարավային Կովկասի հանրապետությունում բռնություններ չծագեն, քանի որ այդ տարածքով են անցնում Կասպից ծովից Եվրոպա ձգվող գազուղիները: