Եգիպտացիներն իրենց նախագահից ազատվելու համար նրան տիեզերք են ուղարկում

Եգիպտական ընդդիմադիր շարժման ակտիվիստները, դժգոհելով նախագահ Մուհամմեդ Մուրսիի քաղաքականությունից, հույս ունեն ազատվել նրանից՝ նախագահին տիեզերք ուղարկելով:

Շարժման անդամները Մուրսիի անունից մասնակցության հայտ են ներկայացրել մրցույթին, որի գլխավոր մրցանակն ուղևորությունն է դեպի տիեզերք. գրում է Риа Новости-ն՝ հղում կատարելով երիտասարդական շարժման Facebook-ի էջում տարածված հայտարարությանը:

«Ապրիլի 6-ի շարժում» անունը կրող նախաձեռնությունը կոչ է անում ակտիվորեն քվեարկել Մուրսիի թեկնածության օգտին, քանի որ մրցույթի մասնակիցները պետք է առաջին հերթին բոլորից շատ քանակությամբ ձայներ հավաքեն Facebook սոցիալական կայքում: Առավել շատ ձայն հավաքած թեկնածուն կմասնակցի պետության առաջնությանը՝ որպես տիեզերք մեկնող թեկնածու:

Նշենք, որ «Ապրիլի 6-ի շարժում»-ը եգիպտական հեղափոխության շարժիչ ուժերից մեկն էր, որոնց աջակցությամբ 2011-ին տեղի ունեցավ նախկին նախագահ Հոսնի Մուբարաքի ռեժիմի տապալումը:

Շարժման ակտիվիստները 2012թ. հունիսին հանդես էին գալիս Մուրսիի պաշտպանությամբ, որը, սակայն, ընտրվելուց հետո չարդարացրեց նրանց սպասելիքները: