Դիտորդական առաքելության ղեկավարն ասել է, որ կարող են արձանագրել միայն այն, ինչ տեսնում են

«Բեկում» ժողովրդավարության աջակցության կենտրոն հասարակական կազմակերպության ներկայացուցիչներն այսօր հանդիպել են Հայաստանում ԵԱՀԿ/ԺՀՄԻԳ դիտորդական առաքելության ղեկավար դեսպան Հեյդի Տալյավինիին և նրա գլխավորած պատվիրակության անդամների հետ:

Հանդիպման ընթացքում «Բեկում»-ի անդամները ներկայացրել են փետրվարի 19-ին «Մարիոթ» հյուրանոցում ԵԱՀԿ/ԺՀՄԻԳ դիտորդական առաքելության ներկայացուցիչների ասուլիսի ժամանակ հասարակական կազմակերպության նախաձեռնությամբ կայացած ակցիայի դրդապատճառները: Կազմակերպության ներկայացուցիչներն ընդգծել են, որ համաձայն չլինելով փետրվարի 18-ին կայացած նախագահական ընտրությունների վերաբերյալ դիտորդական առաքելության գնահատականների հետ՝ խնդիր են ունեցել հասարակությանը, միջազգային հանրությանը, դիտորդներին ներկայացնել իրենց այլընտրանքային հայտարարությունը:

Կազմակերպության անդամները դիտորդներին հայտնել են, որ մտահոգված են ընտրությունների վերաբերյալ վերջիններիս հնչեցրած գումարային գնահատականով և համարում են, որ այն չի արտահայտում տեղի ունեցածի իրական պատկերը: Նրանք ընդգծել են, որ ընտրությունների ընթացքում դիտորդների արձանագրած ցանկացած իրավախախտում պետք է խստագույնս դատապարտվի և հույս են հայտնել, որ ԵԱՀԿ/ԺՀՄԻԳ վերջնական զեկույցում ընտրությունների վերաբերյալ գումարային գնահատականը էապես կտարբերվի փետրվարի 19-ին հնչած նախնական գնահատականից:

Մեծապես կարևորելով համամարդկային արժեքների ու իրավունքի գերակայության գաղափարի տարածումը Հայաստանում՝ «Բեկում»-ի անդամները համոզմունք են հայտնել, որ ԵԱՀԿ/ԺՀՄԻԳ դիտորդական առաքելության կողմից ընտրական գործընթացի իրական պատկերը չարտահայտող գնահատականների հնչեցումն էապես խոչընդոտում է Հայաստանի ժողովրդավարության հաստատմանը:

Դիտորդական առաքելության ղեկավար Հեյդի Տալյավինին իր հերթին ասել է, որ իրենց մանդատը սահմանափակված է դիտորդական ֆունկցիայով, ինչի պատճառով առաքելության ներկայացուցիչները կարող են արձանագրել միայն այն, ինչ տեսնում են: Ընտրախախտումները արձանագրելու գործում տիկին դեսպանը կարևորել է հատկապես հասարակական կազմակերպությունների, զանգվածային լրատվության միջոցների, վստահված անձանց և տեղական դիտորդների գործունեությունը: Նա նշել է, որ 57 անդամ պետություն միավորող ԵԱՀԿ-ն ոչ թե եվրոպական, այլ՝ միջազգային կառույց է և այդ կազմակերպության մաս հանդիսացող ԺՀՄԻԳ-ի կազմում աշխատում են տարբեր ազգերի ներկայացուցիչներ: Վերջում տիկին Տալյավինին հավաստիացրել է, որ ԵԱՀԿ/ԺՀՄԻԳ վերջնական զեկույցի կազմման ժամանակ դիտորդական առաքելության ներկայացուցիչները հաշվի կառնեն հասարակական կազմակերպության անդամների հնչեցրած մտահոգությունները:

Հիշեցնենք, որ փետրվարի 19-ին «Մարիոթ» հյուրանոցում ԵԱՀԿ/ԺՀՄԻԳ դիտորդական առաքելության ներկայացուցիչների ասուլիսի ժամանակ «Բեկում» ժողովրդավարության աջակցության կենտրոն հասարակական կազմակերպության նախաձեռնությամբ տեղի էր ունեցել ակցիա. քաղաքացիներն ընդհատել էին դիտորդական առաքելության ներկայացուցիչների ասուլիսը, ինչից հետո հրապարակել էին իրենց այլընտրանքային հայտարարությունը: Հայտարարությունում մասնավորապես ասված էր. «Նախօրեին Հայաստանում տեղի ունեցած նախագահական ընտրություննեը նախորդ նախագահական ընտրությունների համեմատ եղել են մեկ քայլ առաջ, երեք քայլ' հետ, երկու քայլ' աջ, կես քայլ ձախ, այն է` չեն համապատասխանել ՀՀ Սահմանադրության, Ընտրական Օրենսգրքի պահանջներին, ինչպես նաև միջազգային չափանիշներին»: Անդրադառնալով քվեարկության գործընթացին՝ քաղաքացիները նշել էին, որ «քվեարկության օրն ընտրատեղամասերը վերածվել են թատերական ներկայացման հարթակի, որտեղ քաղաքացիները դրսևորել են իրենց վերաբերմունքը գործընթացին: Այսպես, մամուլն ու սոցիալական ցանցերը ողողված են անվավեր դարձած քվեաթերթիկների լուսանկարներով: Քվեաթերթիկների վրա քաղաքացիները պատկերել են բուսական ու կենդանական, ինչպես նաև հեքիաթային ու մուլտիպլիկացիոն աշխարհի միավորներ, իսկ ընտրատեղամասերից մեկում ընտրողն ի նշան բողոքի կերել է իր քվեաթերթկիը»: