«Հրապարակ». Միտինգ անողները պատկերացում անգամ չունեն, թե սահմանին ինչ է կատարվում

Տավուշի մարզի մի քանի գյուղեր՝ Մովսեսը, Այգեպարը, Ներքին Կարմիրաղբյուրը, երեկ երեկոյից կրկին հայտնվել են հակառակորդի
կրակահերթի տակ: գրում է, որ հակառակորդը դարձյալ գնդակոծել է գյուղերը՝ կրակ բացելով խաղաղ բնակիչների վրա: Մովսեսի գյուղապետ Արարատ Ավալյանը «Հրապարակ»-ի հետ զրույցում ասել է, որ կրակոցները սկսվել են ժամը 19-ից և շարունակվել մինչև 22:30-ը:

«Մոտ ժամուկես ինտենսիվ կրակել են գյուղի վրա տարբեր տրամաչափի զենքերից: Գնդացիրներ, ԿՊՎՏ»: «Երեկ Շիլկայից էլ են
կրակել մեր գյուղի վրա: Սա առաջին դեպքն էր վերջին ժամանակահատվածում»,-ասաց գյուղապետը՝ ավելացնելով, որ կրակոցները դադարել են միայն մեր կողմից պատասխան կրակոցներից հետո:

Իսկ երեկ, չգիտես ինչու, պաշտպանության նախարարության մամուլի պատասխանատուն հայտարարել էր, որ «հակառակորդի կրակը ոչնչով այս անգամ արտառոց չի եղել, նույնիսկ ինչ-որ առումով, կարելի է ասել՝ սովորական: Հակառակորդը գիշերը ստացել է համապատասխան հակահարված: Այդ կրակոցները անգամ գնդակոծել անվանելը մի քիչ չափազանցված է, ինչ մնաց հրետակոծել կամ ռմբակոծել:

Հակառակորդը չի կարող և չի կրակել Շիլկայից, և, բնականաբար, պարկուճներն էլ չէին կարող հայտնվել գյուղում»: Այստեղ տեղին է հիշել ժողովրդական ասացվածքը, թե «ես եմ վանքից գալիս, դու ես ասում տեր ողորմյա»: Գյուղապետը հայտնեց, որ Մովսեսը միայն նյութական վնաս է կրել: Վնասվել են բնակարանների տանիքները, պատուհանները, պատերը: «Բարեբախտաբար, մարդկային զոհեր չկան»,- ավելացրեց Մովսեսի գյուղապետը: 

Նա նաև ընդգծեց, որ այս կրակոցներն ընդհանրապես պայմանավորված չեն Հայաստանում կատարվող իրադարձություններով: «Ամեն օր երկրում ընտրություններ չեն: Դա ի՞նչ կապ ունի: Համարյա ամեն օր էլ կրակոցներ կան, ուղղակի ձեր մոտ են ուշ իմանում դրա մասին: Դա բացառապես թուրքի կամքի հետ է կապված»:

Ավալյանը վերջում հորդորեց Ազատության հրապարակում տեղի ունեցող միտինգները Մովսես գյուղում կազմակերպել: «Մոռացել են 90-ական թվականները, երբ բոլորը համախմբվել էին: Հիմա էլի փորձում են ազգը պառակտե՞լ: Երկիրը սահմանից է սկսվում, իսկ այնտեղ միտինգ անողները պատկերացում անգամ չունեն, թե այստեղ ինչ է կատարվում: Այստեղ մարդիկ չեն կարողանում հանգիստ քնել, իսկ այնտեղ մարդիկ ուրիշ բաների են ձգտում: Եղբայրությունն այդպես չի լինում»,- եզրափակեց մշտապես թշնամու գնդակի տակ ապրող
գյուղապետը: