«ՀԺ». Գյումրեցիները գնալու են հանրահավաք

Երեկ «Հայկական ժամանակը» զրուցել է Շիրակի մարզկենտրոն Գյումրի քաղաքի մի քանի բնակիչների հետ՝ պարզելու, թե ինչպիսի
կարծիք ունեն Շիրակի մարզում հաղթանակ տարած նախագահի թեկնածու Րաֆֆի Հովհաննիսյանի այս վերջին մի քանի օրվա ընթացքում ծավալած գործողությունների մասին, արդյոք գնալու են այսօրվա նրա հանրահավաքին:

Վերժինեն, ով անկեղծացավ, թե ընտրել է Րաֆֆի Հովհաննիսյանին և համոզված է որ նա է ընտրվել, ասաց որ ողջունում է Հովհաննիսյանի՝ նման պայքարը, լավ է, որ ժողովուրդը նրա կողքին է, և ինքը անպայման գնալու է նրա հանրահավաքին, չնայած, որ մի քիչ վախենում է. «Մեր իշխանականները էնքան անամոթ են, որ կարողա էլի մի քանիսի գլխներին խփեն՝ ձենները կտրեն, մենակ մեր խեղճ ժողովուրդը էլի նորից կտուժի էս ամենից, Րաֆֆին հզորություն չունի, պրոստը իրա հզորությունը իրա աշխատանքային ընկերներն են, ուրիշ ոչ մի բան»,-ասաց գյումրեցի կինը: Խոսելով նախնական հաշվարկներով հաղթած թեկնածուի մասին՝ Վերժինեի ձայնը մի տոն բարձրացավ. «Ոնց կարա ընտրվի էն մարդը, ում մոտենում, ասում են՝ երեխես ծանր հիվանդ ա, ինքը ասումա՝ իմ խնջույքը ինչի ես եկել խանգարում...ինքը Լենինականի համար բան չի արել, դրա համար էլ մարդիկ իրան ձեն չտվեցին, էն փողերն էլ, որ բերել բաժանել են, դրանք մաղարիչ են, Սերժին ընտրողները սաղ վախից են ընտրել իրան, ում ուզում ես՝ հարցրու, պարզ ա՝ «նապադենի» են արել ու ասել են, եթե հանկարծ որևիցե մեկդ Սերժին չընտրի, աշխատանքից դուրս կթռնի, մարդիկ էլ ասում են՝ էսքան տարի աշխատել ենք ու մի քանի տարուց թոշակի
ենք անցնելու, ուրիշ ճար չկա»,- ասաց նա: 

Որպես հնարավոր տարբերակ Վերժինեն կեսկատակ-կեսլուրջ առաջարկեց «Հնարավոր չէ՞, ասենք, որ երկու հատ նախագահ լինի, մեկը լինի էն աշխատողների համար, ում որ Սերժը ձեռ ա տալիս, մյուսն էլ ժողովրդական, ի՞նչ կեղնի, որ 2 հատ նախագահ լինի, որ գոնե մեկը էս ժողովրդի ցավը հոգա»: 

Գյումրու մեկ այլ բնակչուհի Վարդուհին ասաց, որ չի հավատում ընտրությունների արդյունքներին, քանի որ դրանք ակնհայտորեն կեղծված են, և պարզ է, թե ում օգտին. «Ես պարզ տեսել եմ բոլոր ընտրակեղծիքները, ընտրակաշառքների համատարած բաժանումը, վարչական ռեսուրսի օգտագործում և այլն և այլն, դա նորություն չի»: Նա ևս ողջունեց պայքարելու շարժումը, որովհետև ըստ նրա ժողովուրդը ինչ-որ անդեմ մարմին չէ, որպեսզի ինչ-որ մեկը գա, ինչ-որ թվեր խփի, ինչ-որ կասկածելի արտահայտություններ անի, ըստ իրա հաղթանակ տանի ու աթոռ զբաղացնի. «Անգամ էն մարդիկ, ովքեր չեն ընտրել Րաֆֆի Հովհաննիսյանին, պետք է պայքարեն էս շարժման օգտին, քանի որ իշխանությունը ուղղակի վերարտադրվում է: Այսօրվա հավաքին անձամբ ես կարող ա չգնամ, քանի որ փոքրիկ ունեմ, բայց որ մեծ հաճույքով կմասնակցեի՝ դա հաստատ ա»,- ասաց նա: