«Հրապարակ». Նիկոլ Փաշինյանի ելույթները Րաֆֆու շարժմանը Լևոնի միտինգների շունչն են հաղորդում

Մի քանի տասնյակ հազար քաղաքացիներ երեկ երեկոյան հավաքվել էին Ազատության հրապարակում՝ լսելու Րաֆֆի Հովհաննիսյան-Սերժ Սարգսյան հանդիպման մանրամասները, որի մասին նախօրեին նախագահի նստավայրից դուրս գալուց հետո ժողովրդին խոստացել էր պատմել «Ժառանգության» առաջնորդը: Մարդիկ անհամբեր էին՝ իմանալու, թե ինչ են խոսել գործող նախագահն ու իրենց թեկնածուն, ում համարում են ընտրված, արդյո՞ք Սերժ Սարգսյանը համաձայնել է խաղաղ հանձնել իշխանությունը, եթե ոչ, ապա որո՞նք են Րաֆֆի Հովհաննիսյանի
հետագա քայլերը:

Սակայն մինչ Րաֆֆին կխոսեր, միտինգավորներին զբաղեցրին երկրի իրավիճակի ու նրա փրկության հնարավոր ելքերի մասին ելույթներով, որոնք հրապարակում գտնվողներին ավելի վճռականություն ու պայքարի կամք էին հաղորդում: 2008 թվականին ձևավորված համաժողովրդական շարժման առանցքային ներկայացուցիչ Նիկոլ Փաշինյանի ելույթից, ում էմոցիոնալ խոսքերն ու կոչերը Րաֆֆու շարժմանը Լևոնի միտինգների շունչն էին հաղորդում, զգացվեց, որ թավշյա հեղափոխության ճանապարհով են գնալու՝ մարտի մեկերից խուսափելու նպատակով: Եվ այդ պատճառով նախ մարդկանց գիտակցության մեջ պետք է տեղի ունենա այդ հեղափոխությունը և Ազատության հրապարակում: 

Թավշյա հեղափոխությանը միանալու էր եկել նաև Հայ հեղափոխական դաշնակցությունը, որը նախագահական ընտրություններում թեկնածու չառաջադրեց և ոչ մեկին չսատարեց, միայն հետընտրական շրջանում, երբ ժողովրդական ընդվզում նկատվեց, սկսեց կենդանության նշաններ ցույց տալ: