Թուրքիան առաջ է քաշել Լեռնային Ղարաբաղի հարցը՝ Հայաստանի հետ սահմանը բացելու համար

Թուրքիան կրկին առաջ է քաշել Լեռնային Ղարաբաղի հարցը Հայաստանի հետ սահմանները բացելու համար: Թուրքիան առաջարկել է, որ Հայաստանը մասնակցի Եվրոպայից Ասիա տարանցիկ նախագծին, եթե Հայաստանը դուրս բերի իր զորքերը «բռնազավթած» 7 տարածքներից: Այս մասին հաղորդում է Hurrietdailynews պարբերականը: 

«Մենք փորձում ենք ակտիվացնել ԵԱՀԿ Մինսկի խմբի`Լեռնային Ղարաբաղի հակամարտության խաղաղ լուծմանն ուղղված գործունեությունը: Մենք Մինսկի խմբի համանախագահներին ներկայացրել ենք ինտեգրացիոն տարանցիկ ուղու նախագիծը 2012 թվականի նոյեմբերին: Այս նախագիծը կգործադրվի խաղաղ պայմաններում, մասնավորապես՝ այն բանից հետո, որ Հայաստանը դուրս կբերի իր զորքերը «բռնազավթած» 7 տարածքներից»,- այս մասին Hurrietdailynews պարբերականին հաղորդել են թուրքական դիվանագիտական աղբյուրները:

Առաջարկված տարանցիկ ուղին կապելու է Թուրքիան, Հայաստանը, Ադրբեջանը և Ռուսաստանը երկաթգծերի և մայրուղիների միջոցով: Կարս-Թբիլիսի-Բաքու երկաթգծին զուգահեռ Թուրքիա-Հայաստան երկաթգիծը վերաբացվելու է կարճ վերականգնողական աշխատանքներից հետո: 

Սերժ Սարգսյանի վերընտրվելուց հետո Թուրքիան չի սպասում կտրուկ փոփոխությունների Լեռնային Ղարաբաղի հիմնահարցի շուրջ: «Մենք չենք սպասում էական փոփոխություններ մինչև 2015 թվականը»,-այս մասին նշել են թուրքական աղբյուրները: