Խոջալուն և Սումգայիթը քաղաքական հաշվեհարդարի և ատելություն սերմանելու միջոց են դարձել. Թոմաս դե Վալ

Ադրբեջանական APA գործակալության թղթակիըցը հարցազրույց է ունեցել կովկասագետ Թոմաս դե Վալի հետ:

Անդրադառնալով Հայաստանում կայացած նախագահական ընտրություններին և լրագրողի այն հարցին, թե ինչպես կարող է Սերժ Սարգսյանի վերնընտրությունն ազդել Ղարաբաղյան հակամարտության խաղաղ կարգավորան վրա, Թոմաս դե Վալն ասել է. «Ես չեմ կարծում, որ ընտրություններն ինչ-որ կերպ կարող են անդրադառնալ Լեռնային Ղարաբաղի իրավիճակի վրա: Սարգսյանը կարող է ավելի վստահ զգալ իրեն երկրորդ անգամ վերընտրվելուց հետո, սակայն Լեռնային Ղարաբաղի հակամարտության շուրջ ստեղծված իրավիճակն այնքան բարդ է, որ իրատեսական չէր լինի որևէ դրական փոփոխություն ակնկալել»:

Թոմաս դե Վալն արտահայտել է նաև Հայաստանում հետընտրական շրջանում ընտրակեղծքիների դեմ ընթացող բողոքի ցույցերի շուրջ իր կարծիքը, և պատասխանելով լրագրողի հարցին, թե այդ դեպքում ինչպես է ԱՄՆ-ի պետքարտուղարությունը դրական արտահայտվել ընտրությունների վերաբերյալ, նշել է. «Ինձ թվում է, որ ընտրոթյունների շուրջ արձագանքը միատարր չէ: Րաֆիի Հովհաննիսյանը հավաքել է ձայների 37%-ը, ինչը բավական լավ արդյունք էր, եթե հաշվի առնենք, որ իշխող նախագահի ձեռքում էր կենտրոնացած երկրի ադմինիստրատիվ ռեսուրսը և պետական լրատվամիջոցները:

Դժվար է ասել, թե Հովհաննիսյանից «խլել են» հաղթանակը, քանի որ մրցակցության հենց սկզբից մարտադաշտը հավասար չէր երկու կողմերի համար»:

Ադրբեջանցի լրագրողը բարձրացրել է նաև Խոջալուի դեպքերի մասին իր հարցը, ինչին մասնագետը պատասխանել է, որ իր կարծիքով «Խոջալուն Ղարաբաղյան հակամարտության ընթացքում վատագույն դեպքերից է, սակայն դա միակը չի եղել: Եվ դա չի նշանակում, որ պետք է դետալ առ դետալ բացահայտել խաղաղ բնակչության սպանության բոլոր դեպքերը պատերազմի ողջ ընթացքում: Ընտրովի արդարադատությունը հարցի լուծում չէ: Դժվար է բալանս պահպանել Խոջալուի և Սումգայիթի զոհերի հիշատակը հարգելու և դրանք քաղաքական նպատակներով օգտագործելու երևույթի մեջ: Ցավոք սրտի, ես առավել հաճախ եմ տեսնում, որ ողբերգական այդ դրվագներն օգտագործվում են քաղաքական հաշվեհարդարների, հակառակորդ կողմերի մեջ ատելություն բորբոքելու նպատակով»: