Հագուստ ընտրելիս Աիդա Սարգսյանի համար առաջնահերթը բրենդը չէ

NEWS.am STYLE-ն «Աստղային ոճ» տեսանախագծում այցելել է երգչուհի Աիդա Սարգսյանին: Տեսախցիկը ֆիքսել է երգչուհու առօրյա եւ բեմական հագուստը, զգեստներ, կոշիկներ, պայուսակներ, աքսեսուարներ եւ սա դեռ ամեն չէ: Նրա զգեստապահարանում «հայտնաբերեցինք» նաեւ դստեր' 4-ամյա Սոնա-Լանայի բեմական զգեստներից եւս: Աիդա Սարգսյանի խոսքով, Սոնա-Լանան մայրիկից ոչ պակաս թիթիզ է եւ ետ չի մնում: Երգչուհու դուստրը նրան ուղեկցել է ոչ միայն մինչեւ ծնվելը' տարբեր համերգային շրջագայությունների մասնակցելով, այլեւ այժմ' թե բեմում, թե տանը' իր խորհուրդներով եւ քննադատություններով;

Աիդա Սարգսյանը NEWS.am STYLE-ին պատմեց, որ հագնվում է իր ճաշակով, տարիների ընթացքում հասկացել է, թե իր կառուցվածքին ինչն է համապատասխան եւ դրանով էլ առաջնորդվում է: «Ես ինձ շատ լավ գիտեմ, իմ ճաշակի վրա եմ հիմնվում, ինչպես նաեւ' մայրիկիս' որպես կողքի աչք, նա էլ ունի նուրբ աչք, ինչու չէ՞ նաեւ' փոքրիկ դստրիկիս»,- նշեց երգչուհին: Աիդա Սարգսյանը դիզայներների հետ համագործակցության մեծ փորձ չունի, մի անգամ աշխատել է Արմեն Գալյանի հետ' նրան վստահելով թե հագուստի դիզայնը, թե դիմահարդարումը, թե վարսահարդարումը:

Հագուստ ընտրելիս նրա համար առաջնահերթը բրենդը չէ, կարեւորը' հագուստը լինի գեղեցիկ, ճաշակով եւ իր մարմնին համապատասխան: Երգչուհին շեշտեց, որ գումար չի խնայում իր եւ ընտանիքի համար, քանի որ գեղեցիկ եւ ճաշակով երեւալու համար պետք է ծախսել: Նա շոփինգի գնում է «զինված» դրամապանակով, գնումներ կարող է կատարել թե Հայաստանի խանութներից եւ տոնավաճառներից, թե արտերկրից' հյուրախաղերի ժամանակ: Շոփինգի ժամանակ եւս Աիդա Սարգսյանի համար ցանկալի է կողքի աչքը, այդ իսկ պատճառով էլ մենակ գնումներ չի անում:Երգչուհին չի խուսափում նաեւ քննադատություններից, բայց դրանք հաշվի է առնում, երբ արդարացի են լինում:

Կանանց տանջող «ինչ հագնել այսօր» հարցը եւս բախում է նրա դուռը, այդ մասին նա փորձում է մտածել գիշերը: Աիդա Սարգսյանը պատմեց, որ լինում են դեպքեր, երբ քնում է, եւ իրեն տեսնում է որեւէ զգեստով, ու հետո գնում է այն: Առօրյայում շատ պարզ եւ հասարակ է սիրում հագնվել, զուգվելը, զարդարվելը չի ընդունում: Բեմական հագուստը տարբերում է առօրյա հագուստից եւ երբեք չի խառնում իրար: Օրինակ' առօրյայում նախապատվությունը տալիս է ջինսերին, նախընտրում է թեթեւ պրակտիկ հագուստ: «Եթե ժամանակին նախապատվությունը տալիս էի տաբատներին, ապա երեխայիս ծնվելուց հետո' զգեստներին, կիսաշրջազգեստներին, այն ժամանակ վայրիությունը կա, տղայական ինչ-որ բան, իսկ հիմա ավելի կանացիության կերպար»,- նշեց նա:

Աիդա Սարգսյանի զգեստապահարանում կարելի է գտնել եւ հայտնի բրենդների հագուստներ, եւ նոր անուններ: Ամենաթանկարժեք զգեստն արժե 800 դոլար: Երգչուհին նշեց, որ «գունասազ» է, ուստի նախընտրում է ամենատարբեր գույների հագուստ: Նորաձեւության ետեւից չի վազում, «ինչքան էլ հագուստը լինի նորաձեւ, բայց ինքը զգա, որ այդ զգեստի մեջ ինքը տձեւ եւ տգեղ է երեւալու, չի հագնի»: «Այն ժամանակ այդքան ուշադրություն չէի դարձնում շատ մանրուքներին, այդքան էլ պատրաստված չէի, հիմա այդպես չէ»: Իմիջային փոփոխություններից եւս չի խուսափում, կարծում է' դրանք անհրաժեշտ են եւ կինը իրավունք չունի միօրինակ լինել: Այժմ երգչուհին ձգտում է վերադառնալ նախկին Աիդա Սարգսյանի չափերին, իսկ այդ ժանանակ եւ զգեստների կարճությունը եւ բացությունը փոխվում է, բայց երբեք չափը չի անցնում, անում է այն, ինչը հաճելի է աչքին:

Ի դեպ, նա հայկական շոու բիզնեսի ամենաոճային երգչուհուն համարում է Արմինկային, իսկ երգիչին' Հայկոյին:

{gallery}957{/gallery}