«Ժողովուրդ». ՀԱԿ-ը և «Ժառանգություն»-ը Մարտի 1-ին չեն միանա

Երևանի քաղաքապետարանը երեկ ի գիտություն է ընդունել ԺԿ նախագահ Րաֆֆի Հովհաննիսյանի լիազոր ներկայացուցիչ Արմեն Մարտիրոսյանի՝ Մարտի 1-ին՝ ժամը 17:00-19:45, Ալ. Մյասնիկյանի արձանին հարող տարածքում հավաք անցկացնելու վերաբերյալ իրազեկումը:

Թերթը տեղեկացնում է, որ ՀԱԿ-ը նույնպես պատրաստվում է Մարտի 1-ին հանրահավաք և երթ անցկացնել՝ ի հիշատակ 2008թ. Մարտի 1-ի զոհվածների: Ազատության հրապարակում կայանալիք այդ հանրահավաքին մասնակցելու է նաև ՀՀ առաջին նախագահ Լևոն Տեր-Պետրոսյանը:

«Ժողովուրդ»-ը փորձել է ՀՀՇ վարչության նախագահ Արամ Մանուկյանից հետաքրքրվել՝ հնարավոր է՝ ՀԱԿ-ը միանա «Ժառանգության» հրավիրած հանրահավաքին. «Արդեն հինգերորդ տարին է, ինչ կազմակերպվում է այդ միջոցառումը: Ո՞ւմ միանանք: Ժամերն էլ չեն համընկում: Մարտի 1-ին արտոնված է միջոցառում ժամը 4-ից մինչև երեկոյան 23:00-ն ընկած ժամանակահատվածը, Ազատության պողոտայից երթով կշարժվենք մինչեւ Մյասնիկյան արձան»: Իսկ «Ժառանգություն» խմբակցության փոխնախագահ Արմեն Մարտիրոսյանը «Ժողովուրդ»-ին հայտնեց. «Մենք տարբեր ժամերի ենք անցկացնում և տարբեր վայրերում»: