«168 ժամ». Կարծում եմ՝ Կոնգրեսի վրա դրվեց, իսկ ՀՀՇ-ի դամբանաքարի վրա գրվեց՝ «ՀԱԿ»

«Մենք մեր կանխատեսումներում, բարեբախտաբար, սխալվեցինք»,-«168 ժամի» թղթակցի հետ զրույցում ասել է «Ժողովրդավարական
Հայրենիք» կուսակցության ղեկավար Պետրոս Մակեյանը՝ խոսելով իր կուսակցության՝ Րաֆֆի Հովհաննիսյանի շարժմանը միանալու մասին: Նա նաև նշել է, որ սխալվել են, քանի որ ընտրություններից առաջ իրենց կուսակցության համագումարն արձանագրել էր, թե 2013թ. նախագահական ընտրությունները Երրորդ Հանրապետության պատմության մեջ առաջին անգամ տեղի են ունենում ոչ ընդդիմադիր ուժային կենտրոնի ձևավորմամբ: 

«Քաղաքական ուժերիս համար դա անտեսանելի էր, բայց պարզվում է՝ հասարակությունն իր համար գտավ ուժային կենտրոնը, այս պահի
դրությամբ՝ Րաֆֆի Հովհաննիսյանն էր»,- ասել է Պետրոս Մակեյանը: Վերջինս, խոսելով ժողովրդի ընդվզման պատճառների մասին, նշել է, որ դրանում դերակատարություն ունեցան մի շարք գործոններ՝ և՛ անարդարության զգացումը, և՛ շարունակվող ու խորացող սոցիալական ծանր
վիճակն ու ոչ մի լույսի շող չտեսնելը: Իսկ ամենակարևոր գործոններից մեկն, ըստ Պ. Մակեյանի, այն է, որ «ժողովուրդը հոգնել է 20 տարի շարունակ տեսնել նույն դեմքերը, նույն ցինիզմը, լսել նույն խոսքերը, նույն ճառերը»:

Ի դեպ, ՀԱԿ դաշինքին մաս կազմող կուսակցության ղեկավարը, խոսելով Լևոն Տեր-Պետրոսյանի կողմից ՀԱԿ դաշինքը լուծարելու և ՀՀՇ- ն ՀԱԿ կուսակցության վերածելու նախաձեռնության մասին, ասել է, որ այդպիսով «Կոնգրեսի վրա դրվեց դամբանաքարը...»: «168 ժամի» թղթակցի ճշգրտող հարցին Կոնգրեսի՞, թե՞ ՀՀՇ-ի վրա է դրվել «դամբանաքարը», Պ. Մակեյանը պատասխանել է. «Կարծում եմ՝ Կոնգրեսի վրա դրվեց, իսկ ՀՀՇ-ի դամբանաքարի վրա գրվեց՝ «ՀԱԿ»»: