Հայաստանն աշխարհի բարեգործ երկրների վարկանշային աղյուսակում վերջին հորիզոնականներում է

Բրիտանական Charities Aid Foundation կազմակերպությունը հրապարակել է 2012-ի բարեգործ երկրների վարկանշային աղյուսակը:

Աղյուսակի առաջատարն է Ավստրալիան, ընդ որում, ոչ միայն անցյալ տարվա, այլև նախորդ 5 տարիների ցուցանիշների համաձայն:

Ավստրալիայի բնակչության 76%-ը պարբերաբար գումարներ է հատկացնում բարեգործական նպատակներով, իսկ բնակչության 1/3-ը զբաղվում է կամավոր հիմունքներով աշխատանքով: Հարցման արդյունքում պարզվել է, որ 67%-ն աջակցություն է հայտնում լրիվ անծանոթ մարդկանց:

Երկրորդ հորիզոնականը զբաղեցնում է Իռլանդիան, պարբերաբար բարեգործությամբ է զբաղվում Իռլանդիայի բնակչության 79%-ը, իսկ որպես կամավոր՝ 34%-ը, 66%-ն էլ պարզապես օգնում է կարիքավորներին:

Կանադան եզրափակել է լավագույն եռյակը: Այստեղ 64%-ը զբաղվում է բարեգործությամբ, 42%-ն աշխատում է կամավոր, իսկ 67%-ն էլ օգնում է կարիքավոր անծանոթներին:

Տասնյակի մյուս հորիզոնականներում են՝ 4-րդ՝ Նոր Զելանդիա, 5-րդ՝ ԱՄՆ, 6-րդ՝ Նիդեռլանդներ, 7-րդ՝ Ինդոնեզիա, 8-րդ՝ Մեծ Բրիտանիա, 9-րդ՝ Պարագվայ, 10-րդ՝ Դանիա:

Հայաստանը հայտնվել է բարեգործ երկրների ցուցակի 119-րդ տեղում: Ռուսաստանը զբաղեցնում է 127-րդ տեղը, Թուրքիան 137-րդ, Ադրբեջանը՝ 76-րդ, իսկ Վրաստանը՝ 128-րդ: