Հավաստագրեր՝ գործարար սիրիահայերին

Փետրվարի 26-ին ՀՀ էկոնոմիկայի նախարարությունում Փոքր և միջին ձեռնարկատիրության զարգացման ազգային կենտրոնի (ՓՄՁ ԶԱԿ) «Աջակցություն սիրիահայերին» ծրագրի շրջանակներում Հայաստանում գտնվող սիրիահայերի համար կազմակերպված «Հաջող սկիզբ» դասընթացի մասնակիցներին տրվեցին հավաստագրեր:

Միջոցառմանը ներկա էին ՀՀ էկոնոմիկայի նախարար Տիգրան Դավթյանը, ՀՀ Սփյուռքի նախարար Հրանուշ Հակոբյանը, նախարարի տեղակալ Վահե Ջիլավյանը և ՓՄՁ ԶԱԿ գործադիր տնօրեն Վարուժան Կարապետյանը:

Ողջունելով հյուրերին' ՓՄՁ ԶԱԿ գործադիր տնօրեն Վարուժան Կարապետյանը հայտնեց, որ «Սկսնակ գործարարների աջակցություն» ծրագրի մասնակիցներից 27-ը կօգտվեն հատուկ սիրիահայերի համար նախատեսված արտոնյալ պայմաններով վարկերից: Ծրագրի մասնակցությունը ենթադրում է 1.5-2 ամիս դասընթացներ, այնուհետ' մինչև 5 մլն դրամ արտոնյալ վարկ (առանց գրավի ու տարեկան 10%-ով) ստանալու հնարավորություն: «Վարկավորման համար պետությունն արդեն տրամադրել է 100 մլն դրամ, սակայն այդ գումարը կարող է ավելանալ»,- ասաց Վ.Կարապետյանը:

ՀՀ էկոնոմիկայի նախարար Տիգրան Դավթյանի խոսքերով՝ պետությունը հնարավորինս աջակցություն է ցուցաբերում սիրիահայերին, որպեսզի նրանք կարողանան Հայաստանում գտնել ոչ միայն իրենց հայրենիքը, այլև հնարավորություն ունենան երկրում իրականացնել տնտեսական գործունեություն: «Այսօր հայտարարում ենք, որ ևս մեկ ծրագիր, ևս մեկ նախաձեռնություն հաջողությամբ իրականացվեց: Սակայն ամենակարևորն այն է, որ ապահովենք այս գործընթացի շարունակականությունը և կարողանանք անընդհատ մեր աջակցությունը ցուցաբերել սիրիահայերին»,- ընդգծեց նախարարը:

Սիրիահայ գործարարները ցանկություն ունեն Հայաստանում զբաղվելու բարձր ճնշմամբ խողովակների արտադրությամբ, հնաոճ կահույքի վերանորոգմամբ, ատամնատեխնիկական ծառայություններով, կարի արտադրությամբ, ավտոտեխսպասարկմամբ և այլն:

Նշենք նաև, որ «Աջակցություն սիրիահայերին» ծրագրի շրջանակներում փետրվարի 21-ին ՀՀ Էկոնոմիկայի նախարարությունում տեղի է ունեցել Հարկային և մաքսային հարցերի պարզաբանումներ սիրիահայ գործարարների համար թեմայով սեմինար-քննարկումը: Հանդիպմանը ներկա էին ՀՀ էկոնոմիկայի նախարարության, Սփյուռքի նախարարության, ՀՀ ԿԱ պետական եկամուտների կոմիտեի և ՓՄՁ զարգացման ազգային կենտրոնի պաշտոնատար անձինք:

Քննարկման ընթացքում մանրամասն ներկայացրվել են Ժամանակավոր ներմուծում և Ժամանակավոր արտահանում մաքսային ռեժիմների ընթացակարգերը, այնուհետև սիրիահայ գործարարները հնարավորություն են ունեցել իրենց հարցերն ուղղել և ստանալ մեկնաբանություններ և պարզաբանումներ համապատասխան մասնագետների կողմից: