«Պատերազմ» ԱԺ հայտարարությունների ժամին

ԱԺ հայտարարությունների ժամին մի պահ թվաց, թե իրավիճակը կարող է դուրս գալ հսկողությունից և դահլիճում հերթական բախումն է արձանագրվելու: Այս անգամ սակայն, ի տարբերություն նախորդ տարիների, բազմիցս իրար ծեծած տղամարդ-պատգամավորների, վիճաբանության բևեռներում կանայք էին: Մի կողմում «Ժառանգության» Զարուհի Փոստանջյանն էր, մյուսում՝ ՀՀԿ-ական Շուշան Պետրոսյանը:

Զարուհին պատրաստվում էր լքել նիստերի դահլիճը, ի դեպ, հենց այս ժամանակ ամբիոնի մոտ հերթական պագամավորը իր ելույթի տեքստն էր կարդում, երբ ՀՀԿ-ական պատգամավոր Շուշան Պետրոսյանը նրան ձեռքով գնալու նշան արեց՝ միաժամանակ ձեռքի շարժումն ուղեկցելով համապատասխան ռեպլիկով. «Գնա, գնա»: Զարուհին, բնականաբար, «տակը մնացողը» չէր: Կանգնեց ու իր վրա բևեռելով դահլիճի ուշադրությունը, բարձր ու չոր տոնով վրա բերեց՝ «կուզեմ՝ կգնամ, կուզեմ՝ կմնամ»: Շուշանն իր հերթին աննահանջ էր՝ «դե, գնա, էլի»: Մի երկու վայրկյան տևած կանացի բարձրախոս վիճաբանությունն արդեն սպառնում էր հայտարարությունների ժամը «պրավալ տալ», սակայն, բարեբախտաբար, կանայք կարողացան ի վերջո ուշքի գալ և դադարեցնել փոխհրաձգությունը:

Զարուհին լքեց դահլիճը, Շուշանն էլ բորբորքված, թե արդեն հանգստացած, շարունակեց մնալ իր աթոռին: Դե, պետք է հաշվի առնել, որ կռվի մասնակիցները կանայք էին, դրա համար էլ հայ ժողովուրդն այս անգամ գոնե զերծ մնաց «համարները հանած ձորն իջած» հարցեր պարզող պատգամավորների տեսլականից:

Լուսինե Կեսոյան