Լիկա Մեսրոպյանը՝ թատրոնի հանդիսատեսից հիասթափվելու և հեռուստասերիալում խաղալու մասին

Դերասանուհի Լիկա Մեսրոպյանը տևական ստեղծագործական դադարից հետո վերադարձել է:) «Արմենիա» հեռուստաընկերությամբ սկսվող նոր «Խաղից դուրս» 25 մասանոց հեռուստասերիալում նա մարմնավորում է գլխավոր հերոսի կնոջը:

Լիկայի հետ զուցեցինք ինչպես ֆիլմում առաջին անգամ նկարահանվելու, այնպես էլ դեռ երեք տարի առաջ թատրոնից հեռանալու մասին: 16 տարի թատրոնում գլխավոր դերերով հանդես եկած դերասանուհին այսօր այնքան վիրավորված է, որ չի էլ մտածում թատրոն վերադառնալու մասին:

Հեռուստասերիալում Լիկան առաջին անգամ է նկարահանվում: «Երբեք չեմ նկարահանվել ֆիլմերում ու սերիալներում, չնայած՝ բազմաթիվ առաջարկներ եմ ունեցել: Այս ֆիլմում համաձայնեցի նկարահանվել, որովհետև շատ եմ հավանում ռեժիսորի նախորդ աշխատանքները' «Կյանքի գինը» և «Վերադարձը», որոնցում ակնհայտ էր ռեժիսորի լավ աշխատանքը: Բացի այդ, այս սերիալը գեղարվեստական ֆիլմի մոտիվներով է նկարահանված: Դերասանական կազմն էլ պրոֆեսիոնալ է,- ասաց Լիկան և հավելեց, որ առայժմ չգիտի՝ հետագայում կրկին կնկարահանվի՞ սերիալներում, թե՞ ոչ: -Ես շատ խիստ քննադատ եմ: Իմ առաջին քննադատը հենց ես եմ և եթե չհավանեմ խաղս կինոյում, այլևս երբեք հանդես չեմ գա ֆիլմում: Ինձ համար սա նոր փորձ է»:

Չնայած դերասանուհին տարիների փորձ ունի և բազմիցս փայլել է թատրոնում, փաստում է, որ թատրոնից հետո ֆիլմում խաղալը բավականին բարդ է: «Թատրոնում ամեն ինչ պետք է ավելի մեծ ու լայն անել' շարժումներդ, միմիկաներդ... ձայնդ պետք է բարձր լինի, կինոն դա չի սիրում: Կինոյում այդ ամենը պետք է շատ մեղմ անել: Իսկ ես տարիներ շարունակ թատրոնում եմ եղել և թատրոնից հետո կինոն փորձություն է:)»:

Նշենք, որ «Խաղից դուրսը» կցուցադրվի մարտի 4-ից: Լիկան նշեց, որ իր դերը շատ մեծ չէ, քանի որ ինքն է այդպես ցանկացել: Նախ՝ ֆիլմում նկարահանվելու արդյունքում չպետք է տուժի նրա բիզնեսը, երկրորդ՝ սա նրա համար նոր քայլ է և միանգամից մեծ դերով հանդես գալ չէր ցանկանա:

Ինչ վերաբերում է թատրոն վերադառնալուն, դերասանուհին նշեց, որ շատ վիրավորված է հանդիսատեսից և հիմա, համենայն դեպս, չի մտածում թատրոն վերադառնալու մասին: «Ես չեմ կարոտել թատրոնը: Կարոտել եմ գործընկերներիս, բայց ոչ թատրոնը: Չգիտեմ ինչ եղավ, բայց թատրոնի հանդիսատեսը շատ է փոխվել: Հանդիսատեսի վերաբերմունքն ինձ համար մեծ հիասթափության և կոտրվելու պատճառ դարձավ: Գիտե՞ք, ինչ սարսափելի է, երբ հանդիսատեսը կարող է գոռալ՝ Ռոմեո մի՛ խմի, Ջուլիետը չի մեռել, կամ ռեպլիկ թողնել՝ ինչ սիրուն ա: Մարդիկ չեն հասկանում, որ ոչ թե տոնածառ են գնացել, այլ Դրամատիկական թատրոն: Հեռախոսով են խոսում ներկայացման ժամանակ, խաղ խաղում... Թատրոն մտնող մարդը պետք է իմանա, որ այնտեղ բարձր չեն խոսում, հեռախոսն անջատում են: Այսօրվա հանդիսատեսը դա չգիտի: Իհարկե, թատրոնում դեռ կա հանդիսատես, որը հասկանում է՝ ուր և ինչու է եկել, սակայն նրանք այնքան քիչ են մնացել: Այսինքն, գուցե այժմ ինչ-որ բան փոխվել է, չգիտեմ: Ես երեք տարի է, թատրոնում չեմ,- ասաց դերասանուհին և հավելեց, որ որպես հանդիսատես էլ թատրոն չի գնում: -Գործընկերներիս հետ կապի մեջ եմ, շփվում ենք, սակայն թատրոն չեմ գնում: Եթե գնամ, կողքիս հանդիսատեսն իրեն այդպես պահի, չգիտեմ նրան ինչ կանեմ»: Լիկան նշեց, որ հանդիսատեսի փոխվելն աստճանաբար չի եղել: Ըստ դերասանուհու՝ նա մեկ տարում է այդքան փոխվել: «Յուրաքանչյուր ներկայացում դերասանից մեծ էներգիա և առողջություն է խլում: Հենց հանդիսատեսն է քեզ վերադարձնում այդ էներգիան, բայց եթե նա ճիշտ չի գնահատում, ես էլ չեմ խաղում»,- եզրափակեց Լիկա Մեսրոպյանը:

 esyes.am