Բաղրամյան 26-ում արտակարգ հավաք է

Նախագահ Սերժ Սարգսյանն արտակարգ հավաք է հրավիրել: Կառավարության ողջ կազմը Ազգային ժողովի հետ հարցուպատասխանից հետո արագ կերպով տեղափոխվեց Բաղրամյան 26, ավանդական դարձած ճեպազրույցը ևս վարչապետ Տիգրան Սարգսյանը չեղյալ հայտարարեց հենց այդ պատճառով. գործադիրի բոլոր անդամները շտապում էին հանդիպակաց մայթ:

Բաղրամյան-Դեմիրճյան խաչմերուկից մինչև Բրիտանական դեսպանատուն ընկած հատվածը, կարելի է ասել, շրջափակման մեջ է հայտնվել նախարարական, մարզպետական և հրավիրյալ մյուս բարձրաստիճանների ավտոմեքենաներից: Հավաքի պատճառով, ըստ երևույթին, տևական ժամանակով Բաղրամյան պողոտան կգտնվի խցանված վիճակում, քանի որ այդ քանակի բարձրաստիճան ավտոմեքենաները մեկ շարքով տեղավորելու անհնարինությունը ստիպեց վարորդներին կայանել մեքենաները նաև երկրորդ շարքով և, քանի որ մեր հարգարժան ճանապարհային ոստիկաններն առանձնակի պատկառանքով են մոտենում նման ավտոմեքենաներին, դրանք այդպես էլ կմնան երկրորդ շարքով կայանված, այնպես որ խցանման թեթևացման հույս մինչև հանդիպման ավարտը կարելի է չփայփայել:

Ի դեպ, բավական ուշագրավ է նաև նախարարական մեքենաների կայանման ձևը, տեղը՝ այն առումով, որ անգամ նման՝ թվում է թե մանրուքները երբեմն ավելի քան խոսուն փաստեր են դառնում դրանց տերերի բարոյահոգեբանական, կամային և այլ որակների բացահայտման համար: Այսպես, մինչ նախարարներից համեստների (եթե, իհարկե, ձևի համար գոնե նման մեկ-երկուսը ունենք) մեքենաները կայանվում էին համեմատաբար հեռու, նախարարը դուրս էր գալիս և օգտագործում սեփական ոտքերը՝ մայթն ի վեր կամ մայթն ի վար մի քիչ քայլելով նախագահական նստավայր մուտք գործելու համար, նստավայրի հենց կենտրոնական դարպասների մոտ մի ավտոմեքենա բառի ուղիղ իմաստով ներխուժեց մայթ՝ հնարավորինս մոտենալով դարպասներին, որից հետո կանգ առավ, վարորդը իջավ մեքենայից, շրջանցեց այն, բացեց հետևի դուռը, որից հետո միայն հասկացվեց, թե ում էր պատկանում արտոնյալ փոխադրամիջոցը: Նստավայրի դիմաց կանգնածներից մեկը, ըստ երևույթին որսալով զարմացած հայացքս, բարձր ձայնով հեռվից կանչեց. «սվո՛յ ա, սվո՛յ»: Հենց այդ ժամանակ էլ մեքենայից իջավ «սվոյ» Հասմիկ Պողոսյանն ու մի քանի քայլ անելով՝ ներս մտավ մուտքից:

Ի դեպ, դատելով շեֆերին մեքենաներից իջեցրած և մայթերին զբոսնող անվտանգության աշխատակիցների, օգնական-վարորդների բազմությունից, հավաքն ավելի քան խայտաբղետ կազմով է. արդեն տևական ժամանակ կատարյալ անգործության մատնված և, Աստված գիտե, թե ինչով զբաղվող Իշխան Զաքարյանից (ովքեր մոռացել են, թե ով է այս անձնավորությունը, հիշեցնենք, որ նա դեռևս Ռոբերտ Քոչարյանի պաշտոնավարման ժամանակ, մտնելով վերջինիս «տամարը», կարողացավ «իրենով անել» ՀՀ Վերահսկիչ պալատի նախագահի «քամարը» և մինչ օրս անպատիժ կերպով վայելում է այն՝ զրկված լինելով որևէ վերահսկողությունից և ինքն իրեն վերապահելով բոլորին վերահսկելու և, ըստ այդմ, ցանկացածի հետ հաշվեհարդար տեսնելու իրավունքը) մինչև Հեռուստատեսության և ռադիոյի ազգային հանձնաժողովի նախագահ Գրիգոր Ամալյան:

Իսկ թե ի՞նչով կավարտվի հավաքը, Սերժ Սարգսյանն ի՞նչ վճիռ կկարդա՝ խաչ հանելով Բաղրամյան 26 մտնող նախարարներից ու մարզպետներից շատերի համար, կերևա առաջիկայում:

Լուսինե Կեսոյան