ԱԺ-ում «պատերազմը» շարունակվեց «կազյոլ»-ով

Ազգային ժողովի աշխատանքային օրվա վերջին հատվածն այսօր էլ զերծ չմնաց «պատերազմական իրավիճակից»: Կողմերն անփոփոխ էին. մի կողմում էլի «Ժառանգությունն» էր, մյուսում՝ ՀՀԿ-ն: «Հրահրողը», կարծես թե, ՀՀԿ ցուցակով պատգամավոր դարձած Հայկ Բաբուխանյանի՝ կառավարությանն ուղղված հարցադրումն էր, որով պատգամավորն իր մտահոգությունն էր հայտնում առ այն, թե որտեղից Րաֆֆի Հովհաննիսյանին այդքան փող՝ նախագահական քարոզարշավ անցկացնելու համար, և արդյո՞ք կա որևէ մարմին, որը վերահսկողության ենթարկի այդ փողերի ծագումնաբանությունը (կարելի է ենթադրել, արդեն երկար տարիներ քաղաքականության մեջ գտնվող Հայկ Բաբուխանյանը երբեք չի լսել, որ մեր երկրում ԱԱԾ անունով կառույց գոյություն ունի՝ Լ.Կ.): Պատգամավորի մտահոգությունն այն էր, թե կարող են նման փողերով «գունավոր» հեղափոխություն կազմակերպել, թե հեղափոխության կոչեր են արվում և այլն:

«Ժառանգության» եզակի պատգամավորները՝ Զարուհի Փոստանջյան, Ռուբեն Հակոբյան, կառավարության հետ հարցուպատասխանին մի քանի րոպե նստելուց հետո վաղուց դուրս էին եկել դահլիճից: Բայց մեկ էլ, Բաբուխանյանը հազիվ էր ավարտել իր հարցը, երբ, ըստ երևույթին, Րաֆֆի Հովհաննիսյանի անունը լսելով՝ դահլիճ շտապած Ռուբեն Հակոբյանը, իբրև թե օրակարգի հետ կապված, ձայն խնդրեց: Այս անգամ սակայն Հովիկ Աբրահամյանը զարմանալիորեն հիշեց ԱԺ կանոնակարգը և ձայն չտվեց Հակոբյանին: Հակոբյանը տեղից մի փոքր էլ հոխորտաց, վրդովվեց՝ չլսելու տալով պատգամավորների հավաստիացումները՝ թե կառավարության հետ հարցուպատասխանի ժամանակ չկա նման իրավունք՝ խոսք խնդրել և մեկնաբանություն ներկայացնել, ինչ է թե՝ ինչ-որ մեկի անունը հնչել է, սակայն Հակոբյանը տեղից վեր կացավ՝ շարունակելով իր վրդովմունքը, բարձրաձայն արտահայտվելով և թեքվելով դեպի դահլիճը, նետեց. «քծնողներին բերել-լցրել եք ԱԺ»: Բաբուխանյանն իր հերթին, որոշելով շարունակել Շուշան Պետրոսյանի «ներդրած» առաջավոր մեթոդները, նետեց՝ «Տո գնա՛, գնա՛»՝ թերևս մի վերապահումով՝ ձեռքով Շուշանի շարժումը չկրկնելով:

Ռուբեն Հակոբյանը, հետ չմնալով «հեղափոխական Փոստանջյանից» (որակումը՝ Հովիկ Աբրահամյանինն է), արդեն դռների մոտ շրջվեց և հակադարձեց. «կազյոլ…»:

Վաղը ԱԺ քառօրյայի վերջին օրն է, այնպես որ «Ժառանգություն»-ՀՀԿ թեժ շփումներին, երևի թե, հետընտրական թեժության ֆոնին մնացել է ընդամենը մեկ օր:

Լուսինե Կեսոյան