Հավատարիմ ավանդույթների՞ն, թե՞ Սերժ Սարգսյանին

Հերթական ԱԺ նիստը... այս անգամ էլ, ինչպես միշտ, ԱԺ-ում կրքերը թեժ էին, ու հերթական անգամ ԱԺ-ում իր ողջ հմայքով փայլեց ԱԺ նախագահ Հովիկ Աբրահամյանը՝ զարկ տալով նախորդ օրվա՝ իր ասած «զորբայության» գործընթացի շարունակությանը: Չնայած նրան, որ շատ հաճախ խոսվում է, որ հենց Հովիկ Աբրահամյանը կգլխավորի պաշտոնանկությունների շարքը, միևնույն է, ԱԺ նախագահը, չկորցնելով իրեն ընձեռված ցանկացած հնարավորություն, օգտագործում է այն ի բարօրություն իր ապագայի տեսլականի:

Նախորդ օրվա նրա ասուլիսը դասվում է հենց այդ փորձարկման շարքին: Ըստ Հովիկ Աբրահամյանի՝ այսօրվա ընդդիմության առաջնորդ համարվող Րաֆֆի Հովհաննիսյանը պետք է դիտարկի կոալիցիոն կառավարություն ստեղծելու մոդելը, ասել է թե՝ նա պետք է ողջամիտ առաջարկություններ անի իշխանություններին: Թե ինչպես Հովիկ Աբրահամյանը, թեկուզ մտքում, կարող էր գալ հարցի լուծման նմանատիպ եղանակի, ակնհայտ է, չէ՞ որ ունեցել ենք Արթուր Բաղդասարյան,Արտաշես Գեղամյան: Մեղադրել նման՝ առաջին հայացքից պրիմիտիվ վարքագիծը, անիմաստ է, քանի որ Հովիկ Աբրահամյանը բազմիցս իր պրակտիկայում հանդիպել է նման դեպքերի, ուստի հավատարիմ մնալով ավանդույթներին՝ վարվում է նման կերպ, սակայն, իհարկե, այս դեպքում ընդդիմությունը բոլորովին այլ կալիբրի է: Բացի այդ էլ, ինչպես նշում է Րաֆֆի Հովհաննիսյանը, զադնի այլևս լինել չի կարող, սա լավ պետք է հասկանա կոալիցիոն կառավարության սիրահար Հովիկ Աբրահամյանը, քանի որ դա լավ հասկանում է նաև Րաֆֆի Հովհաննիսյանը:

Իսկ այն, որ Հովիկ Աբրահամյանի մոտ ընդդիմության վերակերպարանափոխումը միշտ ստացվել է, փաստ է։ Միայն հիշենք ոչ վաղ անցյալում ԲՀԿ-ի ոդիսականը: Ի նկատի ունենալով ոչ վաղ անցյալում իր ձեռքբերումները կոալիցիոն կառավարության պրիզմայում՝ Հովիկ Աբրահամյանն այս անգամ փորձում է իր բախտը, քանզի այլ տարբերակ, ըստ էության, այլևս չունի: Ստացվում է, որ ամեն անգամ, ամեն պարագայում Հովիկ Աբրահամյանը հանդիսանում է հաշտության, ավելի ճիշտ, կոալիցիոն օղակի հանգույց, ով ցանկացած ծանր իրավիճակում պաշտոններ է առաջարկում:

Իհարկե, ի նկատի ունենալով հեռանկարները, որին և, ամենայն հավանականությամբ, նվիրված էր երեկ Բաղրամյան 26-ում Սերժ Սարգսյանի հրավիրած ԱԽ ընդլայնված նիստը, Հովիկ Աբրահամյանը պետք է շտապի, քանի որ փոփոխությունների ժամանակն արդեն շատ մոտ է, իսկ այդ փոփոխությունների արդյունքում վերևում հայտնվելու համար պետք է աշխատել: Իսկ փոփոխություններ հաստատ լինելու են. Բաղրամյան 26-ում նիստը հենց այդ նպատակն էր հետապնդում, եթե չխոսենք դրա ֆորմալ կողմի մասին:

Այո, հենց փոփոխություններն են, որ կարող են դառնալ, թեկուզ կարճատև, բայց, այնուամենայնիվ, լուծում ընդվզման հետ կապված խնդիրների համար. դա միակ տարբերակն է ժողովրդին ցույց տալու, որ կառավարման համակարգում լուրջ փոփոխություններ են լինելու, իսկ մյուս տարբերակին Սերժ Սարգսյանը միանշանակ չի գնա՝ ուժին. հակառակ պարագայում դա կլինի թե՛ իր, թե՛ իշխանության բանկռոտն ու մահափորձը: Այո, միակ տարբերակը փոփոխությունն է, որից և գիտակցաբար փորձում է օգուտ քաղել ԱԺ նախագահը, իսկ այդ քաղցր պտուղից օգտվելու գրավականը Հովիկ Աբրահամյանի համար հենց Րաֆֆի Հովհաննիսյանն է:

Գևորգ Ավետիսյան