Ի՞նչ է առաջարկել Սերժ Սարգսյանը Րաֆֆի Հովհաննիսյանին. մանրամասներ գաղտնի հանդիպումից

Մեզ հաջողվել է որոշ մանրամասներ ճշտել Սերժ Սարգսյան-Րաֆֆի Հովհաննիսյան հանդիպումից: «Ժառանգության» առաջնորդը, ճիշտ է, մեկ օր բոլորին սպասեցնելուց և անորոշության մեջ պահելուց հետո հաջորդ օրը փորձեց անկեղծանալ և ինչ-ինչ մանրամասներ հաղորդել այդ հանդիպումից, այնուամենայնիվ, պետք է նկատել, որ վերջինիս անկեղծությունն այդքան էլ ամբողջական չէր և ամեն ինչ չէր, որ տեղ էր գտել այդ անկեղծության մեջ: Մասնավորապես, Հովհաննիսյանը, կարծես թե, բավարարվեց թվարկելով զուտ այն, ինչ ինքն էր առաջարկել Սերժ Սարգսյանին՝ չեղյալ հայտարարել ընտրությունները, ցրել Ազգային ժողովը…, որոնց նախագահը, ինչպես գիտենք, տվել էր մերժողական պատասխան:

Այս պահով և այս չափով Րաֆֆի Հովհաննիսյանի անկեղծությունն իսկապես հարյուրտոկոսանոց կարելի է համարել: Նման առաջարկներ, պետք է ասել, Հովհաննիսյանն իսկապես արել է Սերժ Սարգսյանին և նախագահի դիրքորոշման հարցում ևս Հովհաննիսյանի ներկայացրածը լիովին համապատասխանում է իրականությանը: Միակ բանը, որ, կարծես թե, մինչ օրս ժողովրդից փորձել է թաքցնել և այդ առնչությամբ նախընտրել է լռություն պահպանել իր և իր համակիրների կարծիքով հաղթած թեկնածուն, այն է, թե ի՞նչ է առաջարկվել հենց Րաֆֆի Հովհաննիսյանին: Այնպես որ միակ պահը, ուր կարելի է Րաֆֆի Հովհաննիսյանի անկեղծությունը ինչ-որ տեղ կասկածի տակ դնել, երևի թե սա է:

Իսկ որ Սերժ Սարգսյանն իսկապես հրավիրել էր Րաֆֆի Հովհաննիսյանին ո՛չ միայն նրանից ինչ-ինչ առաջարկներ լսելու, այլ նաև որոշ առաջարկություններ անելու համար, խոսվում էր դեռ մինչև Հովհաննիսյանի՝ Բաղրամյան 26-ում հայտնվելը, այնտեղ գտնվելու ընթացքում և դրանից հետո:

Եվ այսպես, ըստ մեր տեղեկությունների, Սերժ Սարգսյանը Րաֆֆի Հովհաննիսյանին արել է մասնավորապես երկու առաջարկություն.

1. Մասնակցել Երևանի ավագանու խորհրդի ընտրություններին, այսինքն՝ ուժերը փորձել Երևանի քաղաքապետի պաշտոնի համար: Իհարկե, դժվար է ասել՝ նախագահը ինչ-ինչ երաշխիքներ տվե՞լ է Հովհաննիսյանին առ այն, որ նա այդ ընտրություններում անպայմանորեն կհաղթի, որի դեպքում միայն հաղթած քաղաքական ուժի լիդերը կարող է հավակնել քաղաքապետի աթոռը զբաղեցնելուն:

2. Ստանձնել մեկ-երկու ոլորտի ղեկավարություն՝ անձամբ կամ միջնորդավորված՝ ներկայացնելով տվյալ ոլորտը ղեկավարելու ընդունակություն ունեցող թեկնածուների:

3. Սերժ Սարգսյանի առաջարկներին Րաֆֆի Հովհաննիսյանն իր հերթին «ոչ» է ասել:

Ահա և ամբողջը: Սակայն թե ինչու է մինչ օրս այս մասին լռություն պահպանում նախագահական ընտրություններում երկրորդ տեղը զբաղեցրած թեկնածուն, երևի թե գիտի ինքը, Հանրապետության նախագահը, մեկ էլ՝ նրանց հանդիպման մանրամասների բոլոր դրվագներին տիրապետող եզակիները: Ի դեպ, խոսվում է նաև 10 օր ժամանակ տալու մասին, որից հետո արդեն Րաֆֆի Հովհաննիսյանը պետք է ներկայացնի իր ընտրած «կոմպրոմիսային» տարբերակը:

Լուսինե Կեսոյան