Հաղորդավարուհի Լիլի Հովերի սրտում միշտ արևոտ եղանակ է

Ամեն օր Armenia TV-ի եթերից մեզ եղանակի կանխատեսումների մասին հայտնում է Լիլի Հովերը: Նա նաև բազմաթիվ երգերի հեղինակ է և շնորհալի աղջիկ: ArmStar.am-ը զրուցել է Լիլիի հետ ու պարզել նրա հաջողության բանալին:

Լիլի, լինելով այսքան երիտասարդ, հաղորդավարի երկար տարիների փորձ ունեք, ե՞րբ և ինչպե՞ս եք սկսել այս ճանապարհը:

Ես հիշում եմ, որ անգամ փոքր տարիքում իմ այսպես ասած «աստղային կուռքերը» հենց նույն ոլորտից էին: Ես սիրում էի հետևել հաղորդավարների աշխատանքին: Դա ինձ համար իսկական առեղծված էր: Հետո գիտակցաբար որոշեցի, որ ուզում եմ հաղորդավար դառնալ և ստիպեցի ծնողներիս տանել ինձ հաղորդավարական մրցույթի, որն անցկացվում էր ՀԵՊԹ-ին կից մանկապատանեկան դպրոց-ստուդիայում:

Ես դարձա առաջին սաներից մեկը, ինձ հետ միասին սովորում էին նաև իմ այժմյան հայտնի ընկերներն ու գործընկերները: Իսկ հաղորդավարական գործում կուռքերից շատերն այժմ իմ գործընկերներն են:

Սկսեցի աշխատել Հայաստանի Հանրային ռադիոյում, որտեղ կերտվեց իմ ամբողջական ռադիո կերպարը և այդ կերպարն այնքան ամուր էր, որ նույնիսկ հեռուստատեսային որոշ «դեմքեր» խորհուրդ էին տալիս ինձ բավարարվել եղածով. մնալ ռադիոյում և հեռուստատեսություն չբերել ռադիոն: /Ժպտում է/: Մեծագույն հարգանքս իմ ավագ գործընկերներին, ովքեր օգնեցին ինձ լինել նախանձելի կիրթ ու գործում' գիտակ:

Ես շնորհակալ եմ կյանքից, որ ինձ միշտ լավ իմաստով բախել է միայն պահանջկոտ ու գիտակ ղեկավարների և գործընկերների: Խոսքս պրոդյուսեր Գրիգոր Նազարյանի մասին է, ում ղեկավարությամբ աշխատեցի մեկ այլ ռադիոկայանում և ճանապարհ հարթեցի նաև հեռուստատաեսային աշխարհ: Դրան հաջորդեցին բոլոր փոքր ու մեծ ռադիո և հեռուստատեսային նախագծերը, որոնցում ես մինչ օրս ներգրավվում եմ կամ հեղինակի կամ հաղորդավարի կարգավիճակով:

Կարծում եմ դեռ նոր-նոր է ամեն ինչ սկսվում:

Այսօր Armenia TV-ի եթերում վարում եք եղանակի տեսությունը: Ինքներդ հետևում ե՞ք եղանակի կանխատեսումներին:

Ամեն օր աչքերս բացվելուն պես նայում եմ երկնքին: Նախ ուզում եմ հասկանալ' արդյոք չեմ սխալվել իմ ներկայացրած կանխատեսման մեջ: Եվ երբ խիղճս հանգիստ է, վայելում եմ օրը' անկախ եղանակային փոփոխություններից: Առհասարակ իմ սրտում միշտ արևոտ է:

Ինձ համար սա շատ պատասխանատու գործ է: Մարդիկ հավատում են ինձ, սպասում եղանակի օրվա կանխատեսմանը և պատկերացրեք, եթե չարդարացվեն նրանց սպասելիքները: Հեռուստադիտողների սերը, հավատացեք, մեկ օրում ձեռք չի բերվում, բայց հնարավոր է մեկ վայրկյանում կորցնել այն. ռիսկային է մեր աշխատանքը: Հայ օդերևութաբանների կանխատեսումներն անսխալ են, հակառակ դեպքում' չէի աշխատի այս ֆորմատում, չեմ սիրում ստել:

Լավ տրամադրություն ունենալու Ձեր բանաձևը ո՞րն է:

Լավատեսությունը….

Ես լավատես եմ և կողքիս չեմ կարողանում հանդուրժել վատ տրամադրված մարդկանց:

Փորձում եմ նրանց վարակել իմ լավատեսությամբ, իսկ եթե չի ստացվում, պարզապես չեմ առնչվում նրանց հետ: Իսկապես վախենում եմ պեսիմիստներից:.

Հավանաբար քչերը գիտեն, որ Դուք մի շարք երգերի հեղինակ եք, կպատմե՞ք Ձեր հեղինակած երգերի մասին:

Այո, ես նաև մի շարք երգերի խոսքերի հեղինակ եմ: Պարզապես հաճելի է, երբ լսում են իմ ստեղծած երգերը, հատկապես առանց իմանալու, որ ես եմ դրանց հեղինակը: Հաճելի է նաև, որ «Հայ Հեղինակ»-ի կողմից, ամեն 3 ամիսը մեկ, հաշվիս մի կլորիկ գումար է հայտնվում: Ուրախ եմ, որ դրանք չեն հնանում:

Լիլի ի՞սկ որտեղ եք սովորել և ի՞նչ մասնագիտություն ունեք:

Ես սովորել եմ Երևանի Թատրոնի և Կինոյի Պետական ինստիտուտում, դոկումենտալ ֆիլմի ռեժիսուրա բաժնում: Եվ ինչպես նշեցի ՀԵՊԹ-ին կից դպրոց ստուդիայի հաղորդավարական բաժնում:

Թեև այժմ մասնագիտությամբս չեմ զբաղվում' ֆիլմեր չեմ նկարահանում, բայց բուն մասնագիտությունս ինձ ամեն վայրկյան օգնում է հեռուստատեսության ոլորտում: Իսկ կյանքում ռեժիսուրան պարզապես անփոխարինելի օգնական է, այն քայլում է ինձ հետ:

-Ինչպե՞ս հասնել հաջողության, ի՞նչ խորհուրդ կտաք ուսանող երիտասարդներին:

Ընդամենը պետք է լինել անկեղծ. միշտ ու ամենուրեք:

Եթե անկեղծ հայտնեք, թե Ձեզ ինչ է պետք և անկեղծ ջանաք դրա համար, համարեք' հաջողությունը Ձեր ձեռքերում է:

Պարզապես հիշեք, որ ոչ ոք այս աշխարհում չի կարող Ձեզ ընկճել ու առաջ շարժվեք ինչ էլ որ լինի: