«ՀԺ». «Ինսուլինն» անորա՞կ է

Շաքարախտով հիվանդ ՀՀ քաղաքացիները, որոնք պետպատվերի շրջանակներում անվճար դեղորայք են ստանում պոլիկլինիկաներից,
ահազանգում են, որ իրենց տրամադրվող դեղորայքը կամ չկա, կամ եղածն էլ վատ որակի է: Ըստ «Հայկական ժամանակի»՝ խոսքը, մասնավորապես, վերաբերում է «Ինսուլին»-ին: Այն, հիվանդների փոխանցմամբ, բելառուսական արտադրության է՝ նախկին եվրոպականի փոխարեն: Բժիշկներն էլ իրենց մտերիմներին խորհուրդ չեն տալիս օգտագործել բելառուսական «Ինսուլին»-ը՝ ասելով, որ դա վատ որակի է: Իսկ ահա շաքարախտի դեմ հաբերի տեսքով դեղորայքը՝ «Դիաբետոն», «Սիաֆոր», «Ամարիլ», ըստ հիվանդների, իրենց չեն տրամադրվում՝
արդեն երկու ամիս: Պատճառաբանությունն է՝ չկա: Խնդրի առնչությամբ «ՀԺ»-ն դիմեց ՀՀ առողջապահության նախարարություն: Նախարարի՝ դեղային քաղաքականության գծով խորհրդական Ղուկաս Ուլիխանյանը հաստատեց, որ «Ինսուլին»-ն իսկապես բելառուսական արտադրության է: Սակայն, ըստ նրա, դեղն արտադրված է միևնույն եվրոպական հումքից: Նախարարի խորհրդականը վստահեցրեց, որ առաջիկա օրերին Հայաստան է ներկրվելու եվրոպական արտադրության «Ինսուլին»: Այն, ինչ որ ստացվել է նաև մինչ այժմ: Բելառուսականն, ըստ Ուլիխանյանի, ժամանակավոր լուծում է, որպեսզի ընդհատում չլինի: Նա, միևնույն ժամանակ պնդեց, որ բելառուսական արտադրության «Ինսուլին»-ը, հիվանդներին տրամադրելուց առաջ, անցել է համապատասխան փորձաքննություն, և դեղն ամբողջովին համապատասխանում է ներկայացվող պահանջներին: Ինչ վերաբերում է դեղահաբերին՝ նախարարի խորհրդականի պնդմամբ, 15-20 օր առաջ դրանք արդեն
տրամադրվել են պոլիկլինիկաներին: Ուլիխանյանը նաև նկատեց, որ ի տարբերություն «Ինսուլին»-ի, նշված մյուս դեղորայքը՝ հարյուր տոկոսով ապահովել, նախարարությունը չի կարողանում: