Ստյոպա Սաֆարյան՝ «Հանրապետական կուսակցությունը դեռ կափսոսա».

ԱԺ նախագահ Հովիկ Աբրահամյանի մոտ երեկ կայացավ խորհրդակցություն՝ ՀՀԿ, «Ժառանգություն» և ՀՅԴ ներկայացուցիչների մասնակցությամբ, որի օրակարգում երեք հարց էր՝ արտահերթ խորհրդարանական ընտրությունների անցկացում՝ մեկ տարվա ընթացքում, համամասնական ընտրակարգի անցում՝ երկու տարվա ընթացքում, ընդդիմության վերահսկողական լծակների ավելացում: Երեկվա հանդիպման ընթացքում կողմերը վերջնական համաձայնության չեն եկել, սակայն խորհրդակցությունները շարունակական են լինելու: «Ժառանգություն» կուսակցության գլխավոր քարտուղար Ստյոպա Սաֆարյանը, «Առավոտ»-ի հետ զրույցում անդրադառնալով խորհրդարանական քննարկումներին, նշեց. «Իշխանությունը պետք է գիտակցի, որ երկրում կա ճգնաժամ: Բոլոր քաղաքական ուժերը ճանաչել են այդ ճգնաժամը և այս կամ այն կերպ արձագանքել են դրան: Եվ եթե Հանրապետական կուսակցությունը շարունակում է համարել, որ ճգնաժամ չկա, ու այդ ճգնաժամը չդարձնել պետական մարմինների և առաջին հերթին՝ Ազգային ժողովի քննարկման առարկա, ապա, իհարկե, Հանրապետական կուսակցությունը, կարծում եմ, դեռ կափսոսա դրա համար, որովհետև ժամանակը, գործընթացը գնում է՝ անկախ «Ժառանգությունից», անկախ
Հանրապետականից, անկախ Րաֆֆի Հովհաննիսյանից: Այն, ինչ մենք տեսնում ենք մարզերում, ավելին է, քան ճգնաժամը: Դա ուղղակի անպատկերացնելի մի տրանսֆորմացիա է, որին ենթարկվում է հասարակությունը, և այդ հասարակությանը նրանք ուղղակի ղեկավարել չեն կարող»: 

«Ժառանգության» հաջորդ քայլը ո՞րը կարող է լինել, փաստորեն Սերժ Սարգսյան-Րաֆֆի Հովհաննիսյան հանդիպմանը Ս. Սարգսյանը չի ընդունել նրա պահանջները, հիմա խորհրդարանում նույն իրավիճակն է՝ հարցրինք Ստյոպա Սաֆարյանին: «Րաֆֆի Հովհաննիսյանը չի թողել, որպեսզի ճգնաժամը հասնի իր գագաթնակետին և ճգնաժամից գիտակցված իշխանության հետ երկխոսություն սկսվի: Րաֆֆի Հովհաննիսյանը չափազանց արագ հիմնական օրակարգը դրեց Ս. Սարգսյանի սեղանին: Դա ունի իր նվազագույն և առավելագույն շեմերը: Սերժ Սարգսյանը և նրա իշխանությունը կարող են ընտրել, թե որն է իրենց բավարարում՝ նվազագո՞ւյն շեմը, թե՞ առավելագույնը»:

Իսկ դեռ հույսեր կարելի՞ է ունենալ, որ խորհրդարանական ֆորմատով կողմերը կարող են համաձայնության հասնել: «Ազգային ժռղովը ինքը պետք է գիտակցի իր պատասխանատվության բաժինը և չափը այս ճգնաժամի հանգուցալուծման հարցում: Պարտադրելով չի, ճնշելով չի, այնտեղ նստած է Սերժ Սարգսյանի թիմը՝ ճնշող մեծամասնությամբ, և նրանք հնարավորություն ունեն թույլ չտալու, որպեսզի ճգնաժամն այնքան խորանա, որը լուծելը ավելի բարդ լինի: Շատ ավելի ճիշտ կլինի, որ իրենք գիտակցեն, որ Աժ-ն պարտավոր է ուղղակի արձագանքել այդ իրավիճակին: Գիտեք, «Ապահով Հայաստան» խոստացողը պիտի նաև Հայաստանը ապահովագրի ճգնաժամից և այդ ճգնաժամին տա լուծում, միայն բառերով չի: Ս. Սարգսյանի թիմը պետք է այդ հանգուցալուծումը տա»,- նշեց «Ժառանգություն» կուսակցության գլխավոր քարտուղարը: