«ՉԻ». Միջադեպ Արմավիրում

Փետրվարի 27-ի երեկոյան միջադեպ էր տեղի ունեցել Արմավիրի քաղաքապետ Ռուբեն Խլղաթյանի եղբոր տղաների և Արմավիրի մարզպետի օգնական Նվեր Պետրոսյանի միջև:

«ՉԻ»-ի տեղեկություններով՝ քաղաքի ավագանու անդամները, տեղեկանալով, որ կառավարության կողմից, հնարավոր է, մերժվի Ռուբեն Խլղաթյանի հրաժարականի դիմումը, քաղաքի օբյեկտներից մեկում կերուխում են սարքել վերջինիս վերադարձը նշելու համար: Այդ կերուխումին հրավիրված է եղել նաև Արմավիրի մարզպետի օգնական Նվեր Պետրոսյանը, ով նույնպես ավագանու անդամ է, բայց վերջինս մերժել է հրավերը: Այդ հանգամանքը զայրացրել է կերուխումի մասնակիցներին, և նրանք «երեկոյից անմիջապես հետո» գնացել են Նվեր Պետրոսյանի տուն՝ նրանից հաշիվ պահանջելու:

Թերթը հիշեցնում է, որ Արմավիրի մարզպետ Աշոտ Ղահրամանյանը ժամանակին բոլոր ջանքերը գործադրել էր, որպեսգի իր օգնականը դառնա Արմավիր քաղաքի ավագանու անդամ՝ նպատակ ունենալով հետագայում նրան դարձնել քաղաքապետ: Թերթը փորձել է Նվեր Պետրոսյանից տեղեկանալ, թե ինչն է եղել վիճաբանության բուն առիթը, սակայն նա կտրուկ հերքել է վիճաբանության մասին լուրը: «Նման բան չկա ու չի եղել: Դրանք սուտ լուրեր են»: «Մեր տեղեկություններով՝ Ձեզ հրավիրել են տոնախմբության, սակայն Դուք հրաժարվել եք մասնակցել և նշել նրանց հետ», թերթի այս դիտարկմանն ի պատասխան՝ ավագանու անդամն ասել է. «Ես քաղաքապետի ու նրա ազգականների հետ ոչ մի խնդիր չունեմ: Ընդհակառակը, երբ ինչ-որ միջոցառում է լինում, ինձ անպայման հրավիրում են, և ես մասնակցում եմ: Կրկնում եմ, այդ լուրերը ճշմարտությանը չեն համապատասխանում»:

Թերթը փորձել է լսել նաև Արմավիրի քաղաքապետ Ռուբեն Խլղաթյանի մեկնաբանությունը միջադեպի մասին, սակայն Խլղաթյանը, տեղեկանալով, որ իրեն լրագրող է զանգահարել, արագ անջատել է հեռախոսը՝ ասելով. «Ցտեսությո՛ւն: Նո քոմենթ»: