Ադրբեջանի հերթական հիստերիան՝ այս անգամ Միլանի Միջազգային տուրիզմի ցուցահանդեսում

Սույն թվականի փետրվարի 14-17-ը Իտալիայի Միլան քաղաքում տեղի ունեցավ Միջազգային տուրիզմի հերթական ցուցահանդեսը: Եվ այս տարի առաջին անգամ Լեռնային Ղարաբաղի Հանրապետությունը ներկայանում էր Հայաստանից զատ՝ ցուցադրելով գրքեր, հոլովակներ, գինի, կոնյակ եւ այլ նյութեր: Լեռնային Ղարաբաղի պատվիրակությունը բաղկացած էր 4 անդամից՝ Պատմական միջավայրի պահպանության և կառավարության զբոսաշրջության բաժնի տնօրեն Սերգեյ Շահվերդյանի գլխավորությամբ:

Ադրբեջանի տաղավարը գտնվում էր Լեռնային Ղարաբաղի Հանրապետությունը ներկայացնող տաղավարի համարյա հարևանությամբ:

Ազերիներն այս անգամ էլ սեփական պարտությունն «արդարացնելու» համար ընկան ինքնախաբեության գիրկը՝ չկարողանալով անտեսել այն փաստը, որ Լեռնային Ղարաբաղն իր առանձին տաղավարն ունի և աշխարհին է ներկայանում որպես ինքնուրույն միավոր: Ցուցահանդեսի մեկնարկից հաշված ժամեր անց Ադրբեջանի ներկայացուցիչներից մեկը մոտենում է ԼՂՀ-ի տաղավարին և գոռոզամտորեն հայտարարում, որ Լեռնային Ղարաբաղի Հանրապետության՝ առանձին տաղավար ունենալը չի համապատասխանում միջազգային իրավական նորմերին: Ասկյարը պահանջում է լքել տաղավարը և դադարեցնել Արցախի մասին թերթոնների բաժանումը: Չբավարարվելով միայն հայտարարութուններով՝ ազերիները նույն գիշերվա ընթացքում (ամսի 15-ին) ներխուժում են ԼՂՀ-ն ներկայացնող տաղավար, առևանգում են գրքույկներ եւ մեծ պաստառը, որի վրա գրված էր «Լեռնային Ղարաբաղ»:

Հարցին միջնորդում է Միլանում գործող Հայաստանի Հանրապետության Պատվո հյուպատոսարանը: Պատվո կոնսուլ Պրն. Պիետրո Քոչուկյանը, ով այս ամենի ականատեսն ու վկան էր, Պրն. Շահվերդյանի հետ միասին դիմում են Ցուցահանդեսի մենեջեր Էմանուելա Ֆոռլինին՝ պատմելով կատարվածի մասին և խնդրում են օգնել՝ կանխելու համար ապագա անախորժությունները:

Սակայն պատմությունն այս ամենով չի վերջանում... Հենց հաջորդ օրը Անվտանգության գլխավոր պատասխանատուն Պրն. Քուչուկյանին և Պրն. Շահվերդյանին իր գրասենյակ է հրավիրում, որտեղ նրանց էին սպասում 4 ադրբեջանցի, այդ թվում՝ Հռոմից ժամանած Ադրբեջանի նախկին դեսպանը: Ազերիները, առաջ բերելով բազմաթիվ անհեթեթ պատճառաբանություններ, շարունակում են պնդել, որ Լեռնային Ղարաբաղի Հանրապետության տաղավարի առկայությունը իրավական խախտման արգասիք է:

Երկար վիճաբանութունից հետո, երբ Անվտանգության գլխավոր պատասխանատուն հասկանում է ադրբեջանական կողմի անհեթեթ պահվածքը, զայրացած դիմում է վերջիններիս, նշելով, որ ադրբեջանցիները ճիշտ վայր չեն ընտրել նման քննարկումներ անցկացնելու համար: Ավելին, նման վարքագծի շարունակությունը կարող է հանգեցնել նրան, որ հաջորդ տարվա ցուցահանդեսում ադրբեջանցիները կզրկվեն տաղավար ունենալու հնարավորությունից:

Հաջորդ օրը ազերիները, մոռանալով, թե ինչի համար են եկել միլանյան ցուցահանդես, իրենց տաղավարում նոր պաստառներ են փակցնում հետևյալ մակագրություններով.

«1 միլիոն ազերի փախստականներ», «Հայերը ներխուժել են Ղարաբաղ» և այլն: Պրն. Կուչուկյանը անմիջապես դիմում է Էմանուելա Ֆոռլինին, ով խոստանում է միջամտել:

Ցուցահանդեսի փակման օրը Լեռնային Ղարաբաղի Հանրապետության պատվիրակությանը այցելեցին նաև իտալահայ գաղութի մի շարք անդամներ՝ Իտալիայի Հայոց Հոգևոր հովիվ Հայր Թովմա աբեղա Խաչատրյանի գլխավորությամբ: Հոգևոր հովվի այցին ի պատասխան՝ ֆիերայի փակումից հետո, պատվիրակությունը այցելեց նաև Միլանի Սուրբ Քառասուն մանկուք եկեղեցի, որտեղ միասնական աղոթք բարձրացրին մեր Հայրենիքի զորացման և մեր ազգի բարօրության համար: Հանդիպման վերջում Հայր Թովման Հայրենիքից ժամանած հյուրերին փոխանցեց իր բարեմաղթանքներն ու շնորհակալությունը՝ մեր Հայրենիքի պատիվը բարձր պահելու և քառօրյա քրտնաջան աշխատանքի համար: