Անպատժելի վարորդ Երևան քաղաքում գոյություն չունի. Երևանի ՃՈ պետ

Երևանի ճանապարհային ոստիկանապետ Արսեն Արշակյանը «Ժողովուրդ»-ի հետ զրույցում նշեց, որ ՀՀ ոստիկանությունն օրենսդրական նոր առաջարկով հանդես կգա՝ վթարների ժամանակ ճանապարհային երթևեկությունն արագ կարգավորելու համար: Ստորև ներկայացնում ենք հարցազրույցից մի հատված:

-Պարո՛ն Արշակյան, նախագահական ընտրություններից հետո տարբեր պաշտոնյաներ հրաժարականներ են տալիս, սպասվում են փոխատեղումներ նաև ոստիկանությունում: Ձեզ ի՞նչ «անակնկալներ» են սպասվում:

-Մենք ծառայող ենք, իսկ պաշտոնի նշանակողն ու պաշտոնից ազատողը ՀՀ ոստիկանապետն է: Ես որևէ տեղեկություն չունեմ, թե պաշտոնի փոխատեղման, թե՛ պաշտոնից ազատելու մասին: Մեկ անգամ ազատվել եմ իմ զբաղեցրած պաշտոնից, ուղարկվել եմ կադրերի ռեզերվ, այնուհետև ոստիկանապետի հրամանով նշանակվել եմ պաշտոնի: Որտեղ ոստիկանապետը նպատակահարմար է գտնում, այնտեղ էլ ես ծառայում եմ:

-Տեսախցիկներից գանձված գումարների ո՞ր մասն է պետբյուջեի հատկացվում: Ճի՞շտ են այն տեղեկությունները, որ տեսախցիկներ տեղադրող ՍՊԸ-ն դե ֆակտո պատկանում է ՀՀԿ առաջնորդ Սերժ Սարգսյանի եղբորը՝ Սաշիկ Սարգսյանին:

-Թե տեսախցիկներն ում են պատկանում, անկեղծ ասած՝ առաջին անգամ Ձեզանից եմ լսում: Բյուջեի մուտքերի մասին տեղեկությանն էլ չեմ տիրապետում:

-Իսկ ՃՈ-ն ինչո՞ւ վթարների ժամանակ չի կարողանում այնպես կազմակերպել աշխատանքը, որ ԱՊՊԱ-ին սպասելիս ժամերով խցանումներ չառաջանան: Հնարավոր չէ՞ վթարից հետո ՃՈ աշխատակիցները կազմեն արձանագրություն, նկարահանեն դեպքի վայրը, այնուհետև մեքենաները դուրս բերեն փողոցից, մինչև ԱՊՊԱ-ն «ժամանի»: Որպես կանոն՝ ՃՈ-ն ավելի շուտ է հասնում, քան ԱՊՊԱ-ն:

-Երբ որ մենք տեսնում ենք՝ իսկապես անելանելի վիճակ է, և բախված մեքենաների պատճառով կարող ենք ունենալ լուրջ խցանումներ, ՃՈ-ն (իհարկե, թվով շատ քիչ դեպքեր են լինում) նկարահանելով մեքենաները դուրս է բերում: Իմ տեղեկություններով՝ ոստիկանությունն օրենսդրական փոփոխություններով հանդես կգա, որպեսզի տեսանկարահանման միջոցով կարողանանք մեքենաներն արագ դուրս բերել ու խուսափել խցանումներից:

-Պարբերաբար Երևանում հայտնվում են վրացական, ռուսական, իրանական պետհամարանիշերով մեքենաներ, երբ դրանք խախտում են ՃԵԿ-ը, որը ֆիքսվում է նաև տեսանկարահանող սարքերի կողմից, ու՞մ է ուղարկվում տույժի մասին տեղեկացնող նամակը:

-Այժմ որևէ գործողություն չի իրականացվում, բայց ես Ձեզ վստահեցնում եմ, որ շատ շուտով մաքսային կետերում մենք կունենանք կոնկրետ հաշվառում այդ մեքենաների հետ կապված, ու հանրապետության սահմանից դուրս գալիս իրենք կվճարեն իրենց կողմից կատարած խախտման համար:

-Ե՞րբ է վերջ տրվելու Երևան-Սևան ավտոմայրուղու վրա ՃՈ աշխատակիցների «պահմտոցիներին»:

-Թո՛ւյլ տվեք Ձեր նշած «պահմտոցու» հետ չհամաձայնել: Կոնկրետ այդ հարցով պետք է 2-րդ գումարտակ դիմեք, բայց ինձ թվում է՝ դա այդպես չէ:

-Իսկ կան այնպիսի համարանիշերով ավտոմեքենաներ, որ ՃՈ աշխատակիցները վախենում են կանգնեցնել և տուգանել՝ անկախ նրանց թույլ տված խախտումի տեսակից:

-Չկա այդպիսի մի մեքենա, չկա այդպիսի մի ՀՀ քաղաքացի, չկա ժողովրդի լեզվով ասած շքեղ մի համարանիշ, որ կարող է ՃՈ-ի վրա ինչ-որ ազդեցություն թողնել: Այդ կարծիքը ստեղծվում է միայն այն մարդկանց մոտ, որոնք փորձում են պատսպարվել այդ կարծիքի հետևում պարզապես աշխատանք չիրականացնելով: Անպատժելի վարորդ Երևան քաղաքում գոյություն չունի: