Աստղիկ Սաֆարյանն Իսպանիայում սիրելի՞ ունի

Արդեն տևական ժամանակ է, ինչ երգչուհի Աստղիկ Սաֆարյանն ապրում և ստեղծագործում է Իսպանիայում: Սակայն հայ հանդիսատեսը նրան չի մոռանում, քանի որ Աստղիկը պարբերաբար ներկայացնում է նոր երգեր, տեսահոլովակներ, ֆոտոշարքեր:

Պարբերաբար շրջանառվող լուրերը, թե Աստղիկն Իսպանիայում սիրելի ունի, այդ իսկ պատճառով չի վերադառնում Հայաստան, չեն համապատասխանում իրականությանը: Աստղիկի՝ Իսպանիայում ապրելու գլխավոր պատճառը ուսումն է: Այս շրջանում նա շարունակում է մասնագիտանալ իր առաջին՝ տնտեսագետի մասնագիտության մեջ, իսկ շատերին հուզող հարցին՝ արդյոք Աստղիկն Իսպանիայում մշտական բնակություն հաստատելու որոշում է կայացրել, նույնիսկ ինքը չի կարող պատասխանել: «Թույլ տվեք շրջանցել և չպատասխանել այս հարցին, քանի որ իսկապես դեռ չգիտեմ»,- esyes.am-ին ասաց տնտեսագետ-երգչուհին և հավելեց, որ շատ է կարոտում, սակայն այս պահին հստակ չի կարող ասել՝ երբ կգա Հայաստան:

«Շատ ուրախ եմ, որ բացի երգելուց, ունեմ շատ լուրջ մասնագիտություն, որում շատ խորացված մասնագիտանում եմ եվրոպական մակարդակով ևս: Եվ երբ գա մի օր, որ զգամ՝ արդեն ասելիք չունեմ երգի բնագավառում, գիտեմ, որ կարող եմ զբաղվել իմ առաջին մասնագիտությամբ, որտեղ ևս շատ ասելիք ունեմ: Իսկ եթե այդպես էլ չգա այդ օրը, գուցե որոշ ժամանակ անց համատեղեմ մեկը մյուսի հետ, ինչպես հիմա»,- իր առաջին մասնագիտության վերաբերյալ ասաց Աստղիկն ու նշեց, որ այս շրջանում չի դադարում ստեղծագործել: Առաջիկայում նա նախատեսում է նոր տեսահոլովակ նկարահանել, սակայն դեռ չի կողմնորոշվել, թե որ երգի հիման վրա. «Գրում եմ նոր երգեր և այստեղ փնտրում ձայնագրման լավ ստուդիաներ, որպեսզի դրանք ձայնագրեմ»:

Վերջերս Աստղիկը որոշակի փոփոխություններ է արել իր արտաքինում. նա կտրել է մազերը: Երգչուհու հետ խոսեցինք այն մասին, որ ըստ հոգեբանական մի շարք տեսությունների՝ կանայք դիմում են արտաքին փոփոխությունների՝ ելնելով իրենց հոգեբանական վիճակից: «Ես չէի ուզում այդ փաստն այդքան կարևորել, քանի որ դա արել եմ ուղղակի ինձ գարնանային թարմ տրամադրություն հաղորդելու և նորության համար: Սակայն ինչպես նկատեցի շատ նամակներից և բազմաթիվ լավ արձագանքներից, այն դարձավ շատ քննարկվող թեմա: Ինձ համար իհարկե շատ հաճելի է»,- ի պատասխան ասաց երգչուհին: Ինչ վերաբերում է նրա միշտ տարբերվող և հետաքրքիր ոճին՝ Աստղիկից տեղեկացանք, որ ոճաբանների հետ չի համագործակցում. «Ոճաբանների հետ միայն կարիերայիս սկզբում եմ համագործակցել: Սակայն մշտական երբեք չեմ աշխատել որևէ ոճաբանի հետ: Միշտ ինքս եմ որոշել բեմական, եթերային և առօրյա կերպարները: Իսկապես շատ հաճելի է, երբ ուղղակի հագնում եմ այն, ինչ ինձ դուր է գալիս և հագուստներս համադրում եմ այնպես, ինչպես ներքուստ զգում եմ: Արդյունքում՝ շատերը դա համարում են տարբերվոող, ոճային, նորաձև: Շատ հաճելի է: Իսկապես»: