Հանրային քննարկում՝ «Փակ շուկա»-ի և Կառավարական 2-րդ շենքի վերաբերյալ

Ս. թ. մարտի 1-ին ՀՀ ճարտարապետների միությունում՝ մտավորականության, հասարակական-քաղաքական կազմակերպությունների նախաձեռնությամբ տեղի է ունեցել Երևանի Մաշտոցի պողոտայի 5 հասցեում գտնվող Կենտրոնական ծածկած շուկայի շինության շուրջ ստեղծված իրավիճակի և Կառավարական 2-րդ շենքի օտարման հետ կապված խնդիրների վերաբերյալ հանրային քննարկում:

ՀՀ մշակույթի նախարարության կողմից հանրային քննարկմանը մասնակցել են ՀՀ մշակույթի նախարարի տեղակալ Արև Սամուելյանը և Պատմության և մշակույթի հուշարձանների պահպանության գործակալության Երևանի տարածքային բաժնի պետ Կարո Այվազյանը:

Մաշտոցի պողոտայի 5 հասցեում գտնվող Կենտրոնական ծածկած շուկայի շինության շուրջ ստեղծված իրավիճակի վերաբերյալ Արև Սամուելյանը տեղեկացրել է, որ ՀՀ մշակույթի նախարարության պահանջով «Երևանի թիվ 1 շուկա» ՍՊԸ-ն մշակել է շուկայի հետնամասի պատերի վերականգնման ու ուժեղացման և նորակառույցի ծավալի երկաթբետոնե տարրերի ապամոնտաժման աշխատանքների նախագիծը՝ հետագայում կորցված կամարների վերականգնման աշխատանքների համար:

Նախագիծը ուսումնասիրվել է ՀՀ մշակույթի նախարարության մասնագետների կողմից և առաջիկա շաբաթվա ընթացքում տեղի կունենա ընդլայնված քննարկում: