Ախոռի նման բերանները բացում են՝ սկսած իմ գիրությունից...

Երգչուհի, ՀՀԿ-ական պատգամավոր Շուշան Պետրոսյանը երեկ «Կենտրոն» հեռուստաընկերության «Հայկական ուրբաթ» հաղորդաշարի եթերում բանավեճի ընթացքում ասել է, որ Մարտի 1-ն ամենացավալի էջը չէ, ավելի ցավալի դեպքեր էլ կան, օրինակ' Հոկտեմբերի 27-ը: «Հադրութում թուրք զինվորների կողմից կրակված ինը զինվորների դեպքը ողբերգությո՞ւն չէր»,- ասել է Շուշան Պետրոսյանը: Դրանից հետո երեկվանից Facebook սոցիալական ցանցում բուռն քննարկում-քննադատություն է սկսվել: Շուշան Պետրոսյանը «Առաջին լրատվական»-ի հետ զրույցում իր զայրույթը հայտնեց, թե որքան կարելի է քննադատել այդ ամենը. «Ախոռի նման բերանները բացում են՝ սկսած իմ գիրությունից, ես ի վերջո կին եմ և երկու տղա եմ մեծացնում, սա ինչ անբարոյականություն է»:

Նա նաև նշեց, որ շատերի քաջությունն ընդամենը ֆեսյբուքյան տիրույթում է, Ֆեյսբուքից դուրս նրանք չկան: «Պատկերացնո՞ւմ եք, մեկը գրել էր՝ ոնց եմ ուզում մեռնես, ու ինչքան շուտ այնքան լավ: Գրողը տղամարդ էր, բայց ինչի՞ համար, ե՞ս եմ արդյոք իր դժբախտության պատճառը»,- ասաց Շուշան Պետրոսյանը:

Նա նաև նշեց, որ Մարտի 1-ը սարսափելի ողբերգություն է, գետինը մտնելու բան է, բայց նույնքան սարսափելի ողբերգություն է իր համար Հոկտեմբերի 27-ը. «Այս երկու դեպքերն ինձ համար հավասարազոր սարսափելի են, ինձ համար սարսափելի է նաև այն փաստը, որ պատերազմը շարունակվում է, և ավելի սարսափելի է, որ չեն գիտակցում այդ փաստը և, իմիջիայլոց, մատների արանքով են նայում, և սա նկատի ունեի Հադրութի թեման շոշափելիս և ուզում էի շարունակել նմանատիպ օրինակները, թե ինչպես ենք ժամանակ առ ժամանակ մամուլից տեղեկանում, թե ինչեր են կատարվում սահմանամերձ շրջաններում, սակայն եթերում թեման ընդհատվեց, ինչը տարբեր մեկնաբանությունների առիթ դարձավ»,- ասաց նա՝ հավելելով, որ սարսափելի է և դժվար է հարմարվել այն մտքին, որ հայը հայի վրա ձեռք է բարձրացնում, բայցևայնպես, սահմանում այսoր զոհվում են հայ զինվորներ թուրքի ձեռքից, որովհետև պատերազմը չի ավարտվել:

«Ի՞նչ է կատարվում, այս ի՞նչ է կատարվում, սարսափելի բան է, երբ չես գիտակցում և պետականորեն չես մտածում, թե դու ինչ երկրում ես ապրում, ինչքան կարևորագույն բաներ կան, որոնք պետք է սառը ուղեղով դատել»,- ասաց նա:

Հարցին՝ բա՞րդ բեռ է պատգամավորի աթոռը, Շուշան Պետրոսյանը պատասխանեց. «Սարսափելի բարդ և հետաքրքիր բան է, և աշխարհում ոչ մի տեղ գրված չէ, որ մշակույթի աշխատողը չի կարող դառնալ պատգամավոր: Ի վերջո, ԱԺ-ում կա մշակույթի, կրթության, գիտության հանձնաժողով, որի անդամ եմ ես, և եթե մշակույթի հանձնաժողով կա, ո՞վ է ասել, որ որևէ ֆիզիկոս, քաղաքագետ, աստղագետ կամ տնտեսագետ չեն կարող այդ հանձնաժողովում աշխատել և տիրապետել նյութին նույնքան լավ, որքան ես: Գուցե ամեն դեպքում մշակույթի ներկայացուցիչ պետք է լինի: Մինչև հիմա մշակույթի ներկայացուցիչները եղել են պասիվ, և այն հարցերը, որոնք ես բարձրացրել եմ մինչև հիմա, վերջին 5-10 տարիներին չեն բարձրացվել: Ես ծառայություն եմ անվանում ԱԺ-ում աշխատելը»,- հավելեց պատգամավորը:Այս մասին գրում է 1in.am-ը:

«Հաջորդ թեման, որ քննարկման առիթ հանդիսացավ. գյումրեցիների մի խումբ բավական անպարկեշտ արտահայտվել է իմ հասցեին, ընդհուպ բոյկոտել են իմ համերգները՝ առաջնորդվելով մի արտահայտությունից, որը չեմ արել. ես իմ մարդկային սկզբունքներով միշտ համարում եմ, որ կաշառք տալը և կաշառք վերցնելը նույնքան հավասարազոր անընդունելի են ինձ համար: Հիմա ուզում եմ հասկանալ, թե որ պահն է այդքան խոցել գյումրեցիներին, ընտրակաշառք տալու կամ վերցնելու իմ վերաբերմո՞ւնքը, խնդրում եմ մեկ անգամ վերանայեն, որովհետև շատ հեշտ է մեկ բառով ջախջախել ամեն ինչ, և դրանից, անշուշտ, Գյումրիի հանդեպ իմ վերաբերմունքը չի փոխվում»,- ասաց Շուշան Պետրոսյանը:

Ի դեպ, կայքի ունեցած հավաստի տեղեկություններով՝ երեկ հաղորդումից հետո Շուշան Պետրոսյանը ելույթ է ունեցել Տիկնիկային թատրոնում: «Ոստան հայոց» ռոք խմբի հետ երգը կատարելուց հետո, որին դահլիճում ներկա է եղել Րաֆֆի Հովհաննիսյանը, վերջինս գրկել է նրան, համբուրել և շնորհավորել փայլուն կատարման համար, հետո նրանք երկար ժամանակ կողք կողքի կանգնած վայելել են համերգը, որից հետո Րաֆֆի Հովհաննիսյանն ու Շուշան Պետրոսյանը ջերմ ողջույններով բաժանվել են իրարից: