Հայաստանում զբոսավարների միջազգային կրթական կենտրոն է հիմնվելու

Հայատանում նախատեսվում է հիմնել զբոսավարների միջազգային կրթական կենտրոն: Այս նպատակով ՀՀ էկոնոմիկայի նախարարության հրավերով Զբոսավարների համաշխարհային ֆեդերացիայի նախագահ Ֆելիսիթաս Վրեսնիգը և փոխնախագահ՝ կրթական դեպարտամենտի ղեկավար Վիլյա Սիբին 2013 թվականի փետրվարի 27-ից մարտի 3-ը Հայաստանում են:

Այսօր լրագրողների հետ հանդիպմանը Ֆելիսիթաս Վրեսնիգը նշեց, որ դեռևս 8 շաբաթ ուսումնասիրություններ են անցկացնելու Հայաստանում, որից հետո վերջնական որոշում կներկայացվի տնօրենների խորհրդին:

«Միջազգային կենտրոն բացելու նպատակը զբոսավարներին միջազգային ստանդարտներին համապատասխան վերապատրաստելն է: Դասընթացներն անցած մարդիկ կստանան մեր անվանաքարտը և կհամապատասխանեն նրանց որակները միջազգային չափանիշներին»,-ասաց նա և նշեց, որ կենտրոնի ստեղծման նպատակներից մեկը միջմշակութային կապ հաստատելն է։

Հայաստանում կան շատ որակյալ և միջազգային չափանիշներին համապատասխանող զբոսավարներ, սակայն անհրաժեշտ է մշտապես հետևել միջազգային կենտրոնների նորանոր ձեռքբերումներին ու քայլել զուգահեռ»,- ասաց ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը: Նա տեղեկացրեց, որ կադրերի վերապատրաստումը նախարարության պետական քաղաքականության հիմնական նպատակներից է: Մենք Հայաստանում ունենք հրաշալի զբոսավարներ: Սակայն դա բավարար չէ, և պետք է մտածել ավելի շատ կադրեր վերապատրաստելու ուղղությամբ: