Րաֆֆու գետը՝ Ծառուկյանի ցամաքած առվում

Այն, որ այսօր ՀՀ-ում բարդ ներքաղաքական իրավիճակ է ստեղծվել ու իշխանություններին, այսինքն՝ վերընտրված Սերժ Սարգսյանին, ոչ մի կերպ չի հաջողվում պարզեցնել այդ վիճակը, փաստ է, որի հեղինակներից մեկն էլ հենց ինքն է: Ստացվում է, որ Սերժ Սարգսյանը չի կարողանում դուրս գալ իր իսկ ստեղծած սարդոստայնից, որում հայտնվել է Րաֆֆի Հովհաննիսյանը՝ սկզբում, ըստ Սերժ Սարգսյանի, մտահղացման զոհի վիճակով, իսկ հիմա, անկախ Սերժ Սարգսյանի կամքից, գնալով թափ հավաքելով՝ լուրջ սպառնալիք է դառնում իր համար:
Րաֆֆի Հովհաննիսյանի մեկ ամսում հաղթանակը մղձավանջի է վերածվում Սերժ Սարգսյանի համար՝ նրան դնելով անհեթեթ իրավիճակում միջազգային հանրության աչքի առաջ: Սակայն Րաֆֆի Հովհաննիսյանի ընտրած այս ճանապարհը հնարավոր է տանի ինքնալիկվիդացման: Այս մասին բազմիցս է խոսվում թե՛ սոցցանցերում, թե՛ իրականում: Իսկ այս օրերին ամենաքննարկվող թեման հենց դրանց շարքից էր՝ Րաֆֆի Հովհաննիսյան-Գագիկ Ծառուկյան հանդիպումը, որը տեղի է ունեցել Րաֆֆի Հովհաննիսյանի նախաձեռնությամբ:

Ի՞նչ սպասել այս հանդիպումից կամ ինչո՞ւ ընդանրապես այն կայացավ: Հարցի շուրջ մտքերը հակասական են։ Ոմանք արդարացնում են Րաֆֆի Հովհաննիսյանի նման քայլը, ոմանք էլ՝ դատապարտում: Սակայն այս պարագայում կա երկու կարևոր հանգամանք՝ ո՞վ է Գագիկ Ծառուկյանը և ի՞նչ է իրենից ներկայացնում նրա ուժը: Հենց այս երկու կարևորագույն հարցադրումներն էին այս օրերին ծավալված քննարկումների հիմքում:

Այսպիսով հանդիպումը Ծառուկյանի հետ կարելի է մեկնաբանել երկու տեսանկյունից:

Առաջին՝ Ծառուկյանը միանշանակ կարող է ուժեղացնել այս շարժումը՝ ժողովրդի շարժումը, չէ որ, ինչպես նշում է հենց ինքը և իր կուսակցության ներկայացուցիչները, իրենք ժողովրդի կողքին են, այսինքն, ըստ տրամաբանության, Գագիկ Ծառուկյանը պետք է սատարի ժողովրդական այս շարժումը, դրանով էլ ինքն իր համար կլուծի բազմաթիվ խնդիրներ, որոնցից հենց առաջինը կորցրած վստահությունը ետ վերդարձնելը կլինի: Այսինքն, Գագիկ Ծառուկյանը միայն ինքն իրենով, եթե դրան էլ գումարենք իր կուսակցությունը, իրենից ներկայացնում է մի ահռելի ուժ, որն ի զորու էր ՀՀ-ում հարցեր լուծել՝ կապված նախագահական ընտրությունների հետ: Բայց հենց այստեղ է, որ առաջ է գալիս երկրորդ հանգամանքը:

Երկրորդ՝ Գագիկ Ծառուկյանը չնայած իր ու կուսակցության մեջ պարփակված անասելի ուժին, թողեց ժողովրդին նախագահական ընտրություններից օրեր առաջ: Իսկ այն, թե նրան ստիպեցին, թե պարտադրեցին դա անել, այլևս նշանակություն չունի, փաստն այն է, որ ստացվեց այնպես, որ Գագիկ Ծառուկյանը չառաջադրվեց: Իսկ ի՞նչ երաշխիք կա, որ եթե նա համաձայնության գա Րաֆֆի Հովհաննիսյանի հետ չի անի նույնը, ինչ արեց նախագահականին ու այս պարագայում էլ իր հերթին նշանակություն չունի դա նրան կպարտադրեն, թե նա ստիպված կլինի գնալ այդ քայլին:

Այսպիսով, Րաֆֆի Հովհաննիսյանը պետք է լավ գիտակցի, թե ում հետ ինչ պայմանավորվածություններ է ձեռք բերում հետագայում մեղքը այս կամ այն ուժի վրա չբարդելու համար: Այս ամենից զատ ամեն դեպքում Րաֆֆի Հովհաննիսյանը հակասում է ինքն իրեն՝ բանակցությունների եզրեր փնտրելով ՀՀ-ում օլիգարխիկ ամենավառ կերպարներից մեկի հետ, ում համագործակցությունը՝ փետրվարի 18-ին կայացած նախագահական ընտրություններին հաղթած ՀՀԿ-ի թեկնածուի հետ ոչ մի դեպքում չի կարելի բացառել, չնայած նրան, որ Գագիկ Ծառուկյանը դեռևս չի շնորհավորել Սերժ Սարգսյանին՝ վերընտրման կապակցությամբ:

Այս պարագայում չի բացառվում նաև այն, որ Րաֆֆի Հովհաննիսյանը նաև հետագայի խնդիրներ է լուծում։ Այսինքն՝ Րաֆֆի Հովհաննիսյանն այս բանակցությունները ծառայեցնում է մայիսի 5-ին կայանալիք ավագանու ընտրություններին, որտեղ ԲՀԿ-ի մասնակցությունը գրեթե կասկածներ չի հարուցում: Այս դեպքում ևս հնարավոր է երկու տարբերակ. առաջին՝ եթե Րաֆֆի Հովհաննիսյանը գրանցի ժողովրդի հաղթանակը և երկրորդ՝ եթե չստացվի հաղթել: Առաջինի դեպքում անտրամաբանական է ստացվում, քանի որ, ըստ Րաֆֆի Հովհաննիսյանի, ժողովրդի հաղթանակը պետք է գրանցվի ապրիլին՝ նախքան ավագանու ընտրությունները: Երկրորդ դեպքում՝ Րաֆֆի Հովհաննիսյանը, չգնալով ընդառաջ Սերժ Սարգսյանի որևէ առաջարկի, ԲՀԿ-ի՝ ավագանու ընտրություններում հաղթելու դեպքում կզրկի Սերժ Սարգսյանին քաղաքապետի պաշտոնից:

Ամեն դպքում Րաֆֆի Հովհաննիսյանը մարտիմեկյան իր գլուխգործոցից հետո երկրորդ անգամ է մտնում նույն գետը, որը Րաֆֆի Հովհաննիսյանի համար արդեն իսկ վերածվել է ականապատ գետի, որտեղ ցանկացած քայլ կարող է պայթյունավտանգ լինել:  

Գևորգ Ավետիսյան