«Ժողովուրդ». Գագիկ Ծառուկյանը հանդիպե՞լ է Հրանտ Մարգարյանի հետ

Երբ փետրվարի 18-ին կայացած նախագահի ընտրությունների արդյունքներն ուսումնասիրում ենք ըստ ընտրատեղամասերի, բավական հետաքրքիր պատկեր է պարզվում: Հատկապես հեռավոր գյուղերում իշխանություններն ապահովել են մասնակցության բարձր ցուցանիշ, ընդ որում մասնակիցների մեծ մասը քվեարկել է հենց Սերժ Սարգսյանի օգտին: Պատկերն ավելի սոսկալի է հատկապես բարձրաստիճան պաշտոնյաների տիրապետության տակ գտնվող գյուղերում' նրանց ծննդավայրերում: Ս. Սարգսյանի ծննդավայր Տեղ գյուղում 891 հոգուց քվեարկության մասնակցել է 831-ը, որից 812-ը քվեարկել են հենց նրա օգտին: ԱԺ նախագահ Հովիկ Աբրահամյանի հայրենի գյուղում' Մխչյանում, 3688 ընտրողից մասնակցել է 3017-ը, եւ նրանցից 2899-ը քվեարկել է հօգուտ Ս. Սարգսյանի: Ահա թե ինչպես է նկարվել Ս. Սարգսյանի 58 տոկոս հաղթանակը:

Լավատեղյակ աղբյուրներից «Ժողովուրդ»-ին հայտնի դարձավ, որ ԲՀԿ նախագահ Գագիկ Ծառուկյանը շաբաթ օրը հանդիպել է ոչ միայն «Ժառանգություն» կուսակցության առաջնորդ Րաֆֆի Հովհաննիսյանի, այլեւ ՀՅԴ բյուրոյի ներկայացուցիչ Հրանտ Մարգարյանի հետ: Համենայնդեպս, մեր աղբյուրները Մարգարյանին տեսել են ԲՀԿ կենտրոնական գրասենյակ մտնելիս: Ենթադրվում է, որ այդ հանդիպումը տեղի է ունեցել Րաֆֆի Հովհաննիսյանի հետ հանդիպման պաշտոնական մասից հետո: «Ժողովուրդ»-ը փորձեց լուրը ճշտել ԲՀԿ խոսնակ Տիգրան Ուրիխանյանից: «Հրապարակման ենթակա բոլոր հանդիպումների մասին մենք տեղեկացնում ենք»,-ասաց Ուրիխանյանը: Հարցին, թե փաստորեն, նման հանդիպում եղել է, ուղղակի հրապարակման ենթակա չէ, Ուրիխանյանը նշեց. «Ո՛չ»: