«Հրապարակ». «Ժառանգությունն» իր առաջնորդի հետ հայտնվել է դժվար դրության մեջ

Եթե անգամ կուլիսային ինֆորմացիայի չտիրապետեինք, դեպքերի պարզ վերլուծությունից կարելի է մի ցավալի հետևություն անել՝ «Ժառանգությունն» ու նրա լիդերը չգիտեն իրենց անելիքը:

Մի կողմից բանակցություններ են գնում Ազգային ժողովում՝ «Ժառանգությունը» ՀՅԴ-ի հետ համատեղ առաջարկների փաթեթ է
փորձում առաջ մղել: Մյուս կողմից՝ «Ժառանգության» առաջնորդը տարանջատվում է այդ բանակցություններից՝ ինքը Հրապարակի
առաջնորդն է և ընտրված նախագահ: Մեկ Րաֆֆի Հովհաննիսյանը հանդիպում է Սերժ Սարգսյանի հետ, մեկ կոչ է անում բոլոր ուժերին
միանալ իրենց: Նախօրեին էլ հանդիպել է Գագիկ Ծառուկյանի հետ:

Մարտի 1-ին նա Սուրբ Սարգիս եկեղեցում էր՝ պատարագի էր մասնակցում, այսօր պատրաստվում է այցելել Եռաբլուր՝ Վազգեն Սարգսյանի գերեզմանին: Ազատության հրապարակում քվեարկության դրեց ինչ-որ դրույթներ, որոնց մեջ նաև Սահմանադրական դատարան դիմելու
առաջարկը, ժողովուրդը կարծես մերժեց այդ գաղափարը, բայց, այնուամենայնիվ, դիմեցին: Մի խոսքով՝ անկանոն, քաոսային ինչ-որ բան կա այս շարժման մեջ: Գործողությունների հստակ ծրագրի բացակայություն: 

Սակայն եթե արդար լինենք ու անաչառ, ապա պետք է արձանագրենք, որ հեշտ վիճակում չի հայտնվել «Ժառանգությունն» իր առաջնորդի հետ միասին: Ի՞նչ անել, ինչպե՞ս անել, որ շարժումը չմարի, որ կոնկրետ շոշափելի արդյունքներ արձանագրվեն, միևնույն ժամանակ՝ ներքաղաքական իրավիճակը չսրի և օրենքի հետ խնդիրներ չունենա: Մի երկրում, որտեղ իշխանությունն իր կարգավիճակը պահպանելու համար պատրաստ է ամեն քայլի՝ սկսած ընտրակեղծիքներից մինչև Մարտի 1, բարդ է գտնել ոսկե այն միջինը, որտեղ դու և
ժողովրդավար երևաս, և վճռական, և միջազգային հանրության համակրանքը շահես, և սեփական ժողովրդիդ համակրանքը չկորցնես: