Կանգ առնենք ու ամեն ինչ սկսենք բարության դաշտից. Վազգեն Սարգսյան (տեսանյութեր)

ՀՀ խոշոր պետական, քաղաքական և ռազմական գործիչ, ՀՀ Զինված ուժերի հիմնադիր, վարչապետ Վազգեն Սարգսյանն այսօր կդառնար 54 տարեկան։

Վազգեն Սարգսյանն ակտիվ հասարակական կյանք մուտք է գործել որպես գրող-լրագրող (1985թ. դարձել է Հայաստանի Գրողների միության անդամ)։

Ավարտել է Ֆիզիկական կուլտուրայի հայկական պետական ինստիտուտը (1976-80)։ 1979-83-ն աշխատել է ֆիզկուլտուրայի ուսուցիչ իր հարազատ Արարատ գյուղի միջնակարգ դպրոցում։

1988-ին սկսած Արցախյան շարժման առաջին իսկ օրերից նա ազատամարտիկների շարքերում էր՝ իբրև արցախյան ազատագրական պայքարի առաջին կազմակերպիչներից մեկը։

1990-91թթ. իր հրամանատարության ներքո միավորել է Երկրապահ կամավորական ջոկատները, եղել է ՀԽՍՀ գերագույն խորհրդի պատգամավոր, պաշտպանության և ներքին գործերի մշտական հանձնաժողովի նախագահ։

1991թ. Վազգեն Սարգսյանը նշանակվել է Հայաստանի Հանրապետության Պաշտպանության նախարար։

1993-ին հիմնադրել է «Երկրապահ Կամավորականների միությունը»՝ ընտրվելով ԵԿՄ նախագահ։

1999-ից մտել է քաղաքական դաշտ՝ դառնալով «Հանրապետական» կուսակցության առաջնորդ, ապա «Միասնություն» դաշինքի համանախագահ։ Խորհրդարանական ընտրություններում «Միասնություն» դաշինքի տարած համոզիչ հաղթանակի արդյունքում 1999 թվականի հունիսից դարձել է Հայաստանի Հանրապետության վարչապետ։ Այդ կարճ ժամանակամիջոցում նա դրսևորեց պետական տաղանդավոր գործչի նոր բարձր որակներ։

«Մենք հաշտության կոչ ենք անում բոլորին։ Թերևս ավելի ճիշտ կլիներ ասել՝ մենք զինադադարի կոչ ենք անում բոլորին։ Կանգ առնենք ու ամեն ինչ սկսենք բարության դաշտից։ Մենք վերցնում ենք ընտրությունների մաքրության մեր մեծ բաժինը, պատասխանատվության մեր մեծ բաժինը։ Մնացյալը ձեր խղճի և ձեր քաղաքական կամքի հարցն է»,-սրանք Վազգեն Սարգսյանի խոսքերն են ՀՀ 5-րդ համագումարի ժամանակ։

Վազգեն Սարգսյանը 1999-ի հունիսից ստանձնում է Հայաստանի Հանրապետության վարչապետի պաշտոնը։ Սակայն նա այդ պաշտոնը զբաղեցնում է ընդամենը մի քանի ամիս, քանի որ նույն թվականի հոկտեմբերի 27-ին ԱԺ հերթական քառօրյայի ժամանակ Հայաստանի Հանրապետության Ազգային ժողովի նիստերի դահլիճում տեղի ունեցավ ՀՀ բոլոր ժամանակներում գրանցված ամենադաժան ոճիրը՝ գլխատվեց ՀՀ քաղաքական էլիտան, նաև Սպարապետ Վազգեն Սարգսյանը։

Փա՛ռք քեզ, ո՛վ հայոց Սպարապետ։