Ոչ մի երկիր չի կարող բացառապես կախված լինել միայն մեկ սահմանից. ԱՄՆ դեսպան (տեսանյութ)

Հայաստանում ԱՄՆ-ի արտակարգ և լիազոր դեսպան Ջոն Հեֆերնն իր տեսաբլոգի 39-րդ թողարկումը նվիրել է ամերիկահայ համայնքի ներկայացուցիչների հետ դեկտեմբերին կայացած հանդիպումներին։

«Դեկտեմբերին տիկնոջս՝ Լիբբիի հետ եղա ամերիկահայ սփյուռքի խոշոր համյանքներում՝ Լոս Անջելես, Սան ֆրանցիսկո, Բոսթոն և Նյու Յորք: Ամերիկահայերին խորապես հետաքրքրում է մերօրյա Հայաստանի Հանրապետությունը և այն մարտահրավերները, որ ծառացած են հայաստանաբնակների առաջ: Իմ ուղերձը ամերիկահայերին այսպիսին էր. «Հայ-ամերիկյան կապերն ամուր են. մեր նպատակն այն է, որ օգնենք Հայաստանին հաջողության հասնել որպես ժողովրդավարական, բարգավաճ և անվտանգ երկիր, ինչը մենք անում ենք ներքին բարեփոխումները խթանելու, Հայաստանի համար հնարավորություններ ու տարբերակներ ստեղծելու և Հայաստանի հայացքը դեպի արևմուտք պահելու միջոցով: Դեսպանատունն ու իր գործընկերները խթանում են ներքին բարեփոխումները քաղաքական, տնտեսական և սոցիալական ոլորտներում: Մենք ուզում ենք Հայաստանին օգնել տարբերակների և հնարավորությունների հարցում, որովհետև ոչ մի երկիր չի կարող բացառապես կախված լինել միայն մեկ սահմանից կամ մեկ գործընկերոջից: Տարբերակները ներառում են Հայաստանի ինտեգրումը տարածաշրջանի մյուս երկրների հետ և առավել սերտ համագործակցությունն Արևմուտքի հետ: Ամերիկահայերի բոլոր հանդիպումներում հնչում էր մի հարց՝ ինչո՞վ կարող ենք մենք օգնել: Երևան վերադառնալուց հետո ես սկսել եմ հետամուտ լինել այդ հարցադրումներին և փորձում եմ գտնել գործընկերության հնարավորություններ հատկապես տնտեսության, ժողովրդավարության, կառավարման և կրթության ոլորտներում: Մենք ցանկանում ենք առևտրի և ներդրումների միջոցով խորացնել տնտեսական կապերը»,-ասվում է տեսաբլոգում:       

Մանրամասները՝ տեսանյութում.