Ինչքան կուզեի, որ այդ հարցը տայիք իրեն, ես էլ կողքից լսեի. Արամ Սարգսյանը՝ Վազգեն Սարգսյանի մասին (տեսանյութ)

«Վազգեն Սարգսյանը համոզված էր, որ այս երկիրը ապագա ունի, Վազգենն ասում էր, որ 21-րդ դարը մերն է լինելու, Վազգենը չի սխալվել 21-րդ դարը մերն է լինելու, դժվար ենք շարժվում առանց իրեն՝ չկա այդ հույս տվողը, ավելին' իրենից հետո հուսահատություն տարածողները շատացան, որոնք մարդկանց մեջ տեսան շողոքորթողին, տեսան սպասելիքներ ունեցողներին, երկիրը բաժանեցին իմ ու քո թիմի, որոնց համար ազնվությունը այնքանով է ազնվություն, ինչքանով իրեն ես ծառայում, ովքեր սիրում են իրենց կենացները խմել, իրենց գովեն, իրենց մասին երրորդ դեմքով, կամ դուքով են խոսում, ու այս տեսակը մեր երկիրը հետ գցեց 21-րդ դար մտնելու առումով»,- լրագրողների հետ զրույցում ասել է Եռաբլուր պանթեոն

այցելած սպարապետ Վազգեն Սարգսյանի եղբայրը՝ Արամ Սարգսյանը: «Բայց այս վերջին ընտրությունները, այս ժողովրդի պահվածքը, իր տված քվեն, իր հավաքականությունը ինձ միանշանակ հույս են տալիս, որ այս ժողովուրդը ապագա ունի, որ փոփոխություններ կլինեն»:

Այսօրվա իրավիճակում ինչպիսի՞ ելք կտեսներ սպարապետը հարցին Արամ Սարգսյանը տվել է հետեւյալ պատասխանը. «Վայ, ինչքան կուզենայի, որ այդ հարցը դուք տայիք իրեն, ինքը պատասխաներ, եւ ես կողքից լսեի: Ցանկացած հայ մարդ, որը իսկապես հայ է, որը նաեւ գնահատվել է ժողովրդի կողմից, դառնալով ՀՀ եւ ԼՂՀ հերոս, դառնալով «Ոսկե արծիվ» շքանշանակիր, այդ կարգի մարդիկ փրկությունը տեսել են ժողովրդի համախմբվածության մեջ, միասնականության մեջ, ծրագրեր դնելու ու դրանք ի կատար ածելու մեջ: Այսօր կարծես ծրագրեր ունեցողներ շատ կան, սակայն ծրագրեր ունենալը այլ բան է, այդ ծրագիրը իրականացնելը ուրիշ բան»:

Ըստ Արամ Սարգսյանի' այս շրջանում Վազգեն Սարգսյանի հույսը կլիներ ժողովուրդը: Հիմա Վազգենը կփորձեր համախմբել ՀՀ այն քաղաքացիներին, ովքեր սիրում են իրենց երկիրը:

ԳԱԼԱ-ի լրագրողի այն հարցին, թե ինչպիսի Հայաստան էր երազում Վազգեն Սարգսյանը եւ արդյո՞ք այն կառուցվել է, Արամ Սարգսյանը ասել է. «Վազգենը պատկերացնում էր հզոր, արժանապատվություն ունեցող հայ մարդ, որը եվրոպացիների նման ժողովրդավարության աշխարհում տեսակետներ հայտնելու իրավունքներից պետք է օգտվեր: 21-րդ դարի Հայաստան էր ուզում Վազգենը»: