«Ազգ». Թուրքիայում ստեղծվել է հայ ոսկերիչների համաշխարհային ընկերակցության բաժանմունք

Թուրքիայի հայ ոսկերիչների ընտրանին 2013 թ. փետրվարի 23-ին Ստամբուլում հավաքվել էր Պոլսո հայոց պատրիարքարանի շենքում, որտեղ անցկացվում էր Հայ ոսկերիչների համաշխարհային ընկերակցության (AJA) ստամբուլյան բաժանմունքի հիմնադիր համագումարը:

Միջոցառումն անցկացվում էր Պոլսո հայոց պատրիարք Մեսրոպ արք. Մութաֆյանի հովանավորությամբ: Նրա ներկայացուցիչըՙ Սահակ եպիսկոպոսը, օրհնությունից հետո ներկաներին դիմեց ողջույնի խոսքով:

AJA-ի գործադիր տնօրեն Արտակ Ուդումյանի խոսքերովՙ Թուրքիայում բաժանմունք բացելու գաղափարը ծագել էր կես տարի առաջ: Ստամբուլում ստեղծվել էր համակարգող հանձնախումբ հայտնի ոսկերիչ Հրաչ Արսլանյանի գլխավորությամբ, որն էլ բացեց նիստը: Նա բաժանմունքի բացումը գնահատեց իբրեւ բազմամյա աշխատանքի արդյունք:

Արտակ Ուդումյանի ելույթում խոսվեց AJA-ի նպատակների, խնդիրների եւ գործունեության մասին: Ուդումյանը ներկաներին փոխանցեց AJA-ի նախագահ Գագիկ Գեւորգյանի ողջույնի ուղերձը եւ շնորհակալությունը հայտնեց «AJA-ի մեծ ընտանիքին միանալու» ձգտման համար:

Հանդիսավոր ճաշկերույթի 300-ից ավելի մասնակիցներին ողջույնի խոսքով դիմեց Ստամբուլի ոսկերիչների պալատի ղեկավար Ալաթին Կամերօղլունՙ ընդգծելով հայ ոսկերիչների մեծ ավանդը համաշխարհային ոսկերչական արվեստի հարուստ ավանդույթների մեջ:

Ա. Ուդումյանի առաջարկությամբ ընտրվեց 40 հոգուց խորհուրդ, որի անդամները ընտրեցին վարչություն: Դրա կազմում ընդգրկված են 3 համանախագահ (Հրաչ Արսլանյան, Էֆրիմ Բաաք, Ավետիս Քենդիր), 3 փոխնախագահ, 2 քարտուղար եւ 1 գանձապահ: