«Հրապարակ». Երևանը նվաճելը հաղթանակի ոգի ու ոգևորություն կբերի

Երեկ Ազատության հրապարակում հնչած ելույթներից մի քանիսը բուռն դժգոհությունների տեղիք են տվել՝ ընդդիմությունն օրակարգային է համարում Երևանի ավագանու ընտրություններին մասնակցելն ու հաղթելը: Դաշնակցության Գերագույն մարմնի ներկայացուցիչ Արմեն Ռուստամյանը ձևակերպեց խնդիրը: «Այսօր իշխանության հասնելու՝ շարժման առաջին հանգրվանը մայիսի 5-ին կայանալիք Երևանի ավագանու ընտրություններն են: Հայաստանի նման երկրում Երևանի քաղաքային իշխանությունը ձեռք բերելը շարժման համար վստահաբար կունենա վճռական նշանակություն իշխանության միահեծան այս վիճակը փոխելու և իշխանություններին շատ ավելի լուրջ զիջումներ պարտադրելու ճանապարհին:

Դժգոհողներն ասում են՝ մենք ՀՀ նախագահ ենք ընտրել, և եթե Րաֆֆին մեզ շեղում է ավագանու ընտրությունների ուղղությամբ, ուրեմն դավաճանում է մեզ, ուրեմն Բաղրամյան 26-ի կամակատարն է և այլն: Դժվար է այսպես խոսողների տրամաբանությունը հասկանալ. մի կողմից՝ նրանք կոնկրետ քայլեր են ուզում և արդյունքներ, մյուս կողմից՝ դեմ են կոնկրետ քայլերին ու գործողություններին: Եթե նրանց հարցնես, թե վերջապես ինչ են պատկերացնում «կոնկրետ քայլերի» տակ, դժվար թե որևէ կոնկրետ բան նշեն: Հանրահավաքներից հոգնել են, բանակցությունները մերժում են, Սահմանադրական դատարան դիմելը համարում են անմտություն, հացադուլը ծաղրում են, դասադուլ ու գործադուլ կազմակերպել չեն կարողանում: Ի՞նչ մնաց տակը՝ զինված հեղաշրջո՞ւմը: Բայց սրանք նաև Մարտի 1-ի «մեղավորներին» էլ չեն կարողանում ներել ու հասկանալ:

Մինչդեռ Երևանը Հայաստանի երկու երրորդն է, նրա հիմնական բաստիոնը: Երևանը նվաճելը հաղթանակի ոգի ու ոգևորություն կբերի: Կապացուցի, որ հաղթելն այդքան էլ բարդ չէ: Եվ դա հնարավոր է անել խաղաղ ճանապարհով: