Ապլադիսմենտի Գագիկու Նիկոլաևիչու

Ահա և տեղի ունեցավ երկար սպասված ԲՀԿ քաղխորհրդի նիստը: «Կանյաչնի»-ում էր, թե՝ ոչ, ինչը հաճախ շահարկում են շատ շատերը, կարևոր չէ. այս անգամ էլ նիստը, որոշումներ կայացնելու վճռականության առումով, չտարբերվեց նախորդից: Սակայն այս նիստի տարբերակիչ ախտանշաններից մեկն իրավմամբ կարելի է համարել ԲՀԿ ոչ բոլոր անդամների ներկայությունը նիստին:

Ամեն անգամ ԲՀԿ խորհրդի նիստի կազմակերպչական թևը մանրակրկտորեն ուսումնասիրում և ընտրում է նիստի մասնակիցներին, որոնց ընտրության համար ամենակարևոր նախապայմանը, ամենայն հավանականությամբ, լավ ծափ տալու կարողությունն է՝ Գագիկ Նիկոլաևիչին «ապլադիսմենտներ» ապահովելու համար, այնպիսին, ինչպիսին հատուկ է միայն թագավորներին: Հենց այդպես էլ եղավ, իսկ ահա բուն նիստն էլ ընթացավ իր հունով՝ առանց միջադեպերի, եթե, իհարկե, Գագիկ Ծառուկյանի՝ յուրաքանչյուր ելույթ ունեցողին ընդհատելն ու սեփական տեսակետը հարցի կապակցությամբ ներկայացնելը հաշվի չառնենք: Այս անգամ Ծառուկյանի խոսքը բարի էր ու կառուցողական՝ սովորականի նման, և, իհարկե, ժողովրդի շահերից բխող: Նախ կառուցողականի կապակցությամբ. Գագիկ Ծառուկյանը նշեց, որ ամեն ինչ լավ է, «մեր թիմը կա, շարունակելու ենք մեր գործը». ի՞նչ գործ՝ մնում է դեռ չպարզված, ամենայն հավանականությամբ, տրակտորների գործը: Այնուհետև եկավ ելույթների պահը. մեկը մյուսի հետևից ելույթ էին ունենում ԲՀԿ անդամները՝ ներկայացնելով սեփական դիտարկմամբ առկա խնդիրները: Արդյունքում, ԲՀԿ արտաքին քաղաքականության պատասխանատվությունը դրվեց Օսկանյանի ուսերին, իսկ ահա Գուրգեն Արսենյանի ելույթից հետո Գագիկ Ծառուկյանն առաջարկեց ԲՀԿ խմբակցության բոլոր պատգամավորներին կես ժամ շուտ ժամանել ԱԺ՝ ամեն ինչից տեղյակ լինելու համար. այս պարագայում անտեղյակները լիովին իրավունք ունեն մտածելու, որ Ծառուկյանը կոչ է անում բոլորին հետևել իր օրինակին, սակայն, իրականում Գագիկ Ծառուկյանը ծայրահեղ դեպքերում է միայն լինում ԱԺ-ում, բայց դե…

«Մենք խորհրդարանական ընտրություններին ներկայացրել ենք մեր տեսակետները, մեր ծրագրերը և ժողովուրդը մեզնից մեծ սպասելիք ունի, մեր խոստումներից ոչ մի քայլ ետ չենք կանգնելու, և ինչ որ ասել ենք, դա պետք է անենք: Ժողովրդի ապրելակերպը շատ ծանր է, մարդիկ իրենց աշխատանքով չեն կարողանում ապրել և հիասթափված, կոտրված երկրից հեռանում են»,- ահա այս ամենից հետո ստեղծվում է մի հեքիաթային տպավորություն, կարծես թե՝ ահա և վերջ, ԲՀԿ-ն և Գագիկ Ծառուկյանն այստուհետ լծված են ժողովրդի շահերի պաշտպանության գործին՝ արտագաղթը վերացնելու ու սպասելիքներն արդարացնելու նվիրական գործին, կարծես դեռևս ՀՀ նախագահի ընտրության նախընտրական շրջանը լինի, երբ Ծառուկյանը պատրաստ էր ամեն գնով ընդվզել նախագահական աթոռին Սերժ Սարգսյանի հայտնվելու իրողությանը, սակայն հեքիաթն ավարտվում է, ու միշտ սկսվում է հաջորդ դասը: Ու այդ դասերից յուրաքանչյուրի ընթացքում էլ «աշակերտները» միայն քննադատում ու քննադատում են, փնովում ու բողոքում ամեն ինչից՝ ներկուսակցական ու երկրի վատ վիճակից՝ չառաջարկելով և ոչ մի լուծում կամ առաջարկելով, բայց դրանք այդպես էլ առաջարկված թողնելով, իսկ «ուսուցիչն» էլ ամեն անգամ աշակերտներին սփոփում է՝ հուսադրելով ու փաղաքշելով հաջորդ դասին հնարավոր ծագող արևի ակնկալիքով, բայց…:

Ամեն անգամ՝ հաջորդ դասին, միշտ զերծ մնալով ներքաղաքական իրավիճակում փոփոխություններ մտցնելու՝ իրենց ընձեռված հնարավորություններից, ստեղծում են արդեն վաղուց՝ դեռևս նախագահական ընտրությունների վերաբերյալ ԲՀԿ հայտարարությունից տպավորություն այն մասին, որ այս ամենը գնալով վերածվում է անիմաստ սոփեստության և երկերեսանիության, ինչը գնալով արմատավորվում է այն հողի մեջ, որը ժամանակին պատրաստել էին հատուկ ԲՀԿ-ի համար:

Գևորգ Ավետիսյան