«Ազգ». Ասում են՝ ժողովրդի կողքին են, ժամանակն է դա ցույց տալու

ԲՀԿ կենտրոնական գրասենյակում տեղի ունեցած քաղխորհրդի ընդլայնված նիստից երեկ մամուլը արտահոսքեր էր արել, որոնք մտածելու տեղիք են տալիս:

Խորհրդարանական ընտրություններում բավական քվե հավաքած, խորհրդարանի թվով երկրորդ կուսակցության եւ նախագահական ընտրություններին չմասնակցած ուժի ղեկավարից ամիսներով առանց միջնորդության տեղեկություն չունեցող հանրությունը ԲՀԿ քաղխորհրդի նիստի' «Կենտրոն» հեռուստաընկերությամբ հեռարձակված տեսանյութում հավանաբար որոնեց քաղաքական օդում առկա շատ հարցադրումների պատասխաններ ու առայժմ չստացավ: Ներկայացված հատվածում ոչ մի խոսք չկա, թե ինչ են խոսել Ծառուկյանն ու ԲՀԿ-ականները ներկայումս ստեղծված քաղաքական իրավիճակի մասին, եւ անգամ հայտնի չէ' պատմե՞լ է նա Րաֆֆի Հովհաննիսյանի հետ իր առանձնազրույցի մանրամասները: Ըստ մամուլային արտահոսքերի' ոչ: Կամ միգուցե' Երեւանի ավագանու ընտրությունների վերաբերյալ տաք քննարկումներից հետո հետաձգված նիստը, որն ըստ լուրերի շարունակվելու է հանգստյան օրերին, ներքաղաքական իրավիճակի վերաբերյալ գնահատականներ էլ կպարունակի:

Իսկ ահա նախագահ Սարգսյանի երդմնակալությունից ու կառավարության սպասվող հրաժարականից առաջ քննադատական խոսքեր ուղղվել են կառավարության հասցեին. «Ժողովուրդը մեզնից մեծ սպասելիք ունի, իսկ ամենակարեւորը' մեր խոստումներից ու ծրագրերից մենք ոչ մի քայլ ետ չենք կանգնելու», ասել է Գագիկ Ծառուկյանը: Նա խոսել է ժողովրդի վիճակի մասին, եւ որ' մարդիկ իրենց աշխատանքով չեն կարողանում իրենց ընտանիքը նորմալ-բարեկեցիկ պահել (դե սա միշտ ասել է նա), ու որ' այդ մարդիկ «կոտրված, ընկճված ու հուսախաբ' երկրից հեռանում են»:

Մարդկանց վիճակից տեղեկանալով' պետք է քայլ կատարել, օգնել, մատից փուշ հանել, «քանի որ մարդիկ ձայն են տվելՙ լիարժեք իմանալով, որ այդ ձայնը տեղ է հասնում»: Իհարկե, այստեղ նոր բան չկա, սակայն եթե նկատի առնենք, որ Գագիկ Ծառուկյանի ձայնը վաղուց հանրությունը չէր լսել, ու դա ե՞րբ է ասվում, կարելի է այս խոսքերի մեջ հավասարապես երկու իմաստ էլ փնտրել, հատկապես եթե նկատի առնենք նաեւ իր կուսակիցների հետ հետագա երկխոսության բովանդակությունը նույն տեսանյութում: Առաջին, 4-5 ամիս լռելը կապվում էր նախագահական ընտրությունների հետ, դրանք անցան ու որեւէ անկանոն շարժում չարվեց ԲՀԿ-ի կողմից, իսկ հիմա այլեւս կարելի է վերահաստատել քննադատական կամ այլընտրանքային կեցվածքը, եւ երկրորդ ու ավելի կարեւոր մեսիջը գուցե այն է, որ Ծառուկյանն ու ԲՀԿ-ն, անկախ նրանից, որ Ազատության հրապարակում ուրիշ մարդ է ներկայացնում քաղաքական դաշտի կարեւոր խաղացողը լինելու հայտը, երկրորդ քաղաքական ուժի սեփական հավակնություններն են հիշեցնում եւ հասցեագրում նոր կառավարություն կազմելուն ու անգամ վարչապետի պաշտոնին: Այլապես' ինչո՞ւ պետք է Նաիրա Զոհրաբյանը խոսեր այն մասին, որ փոքր ու միջին բիզնեսի մեջքն ուղղելու վերաբերյալ իրենց բոլոր օրենսդրական նախաձեռնությունները կառավարությունը մերժել է, ու եթե «ադեկվատ կառավարություն» լինի' դրանք վերստին ներկայացվելու են: Ծառուկյանն էլ իր խոսքում է նշել, թե ԲՀԿ-ն ստեղծվել է, որ կարողանա մարդկանց օգնել, պրոբլեմները կարգավորել, ու մարդիկ պայման ու հնարավորություն են ուզում ընդամենը աշխատելու եւ ընտանիքը պահելու:

Իսկ ահա այն, թե ինչպես քվեարկեն ԲՀԿ-ականներըը խորհրդարանում' Ծառուկյանը ապսպրում է ԲՀԿ-ականներին թափանցիկ ակնարկներով' ուղղված խորհրդարանական գործընկեր ՀՀԿ-ին. «Քվեարկեք այնպես, որ փողոց դուրս գալով լիարժեք կարողանաք մարդկանց երեսը նայել, հպարտ քայլել, ոչ թե տեսնելուց' պախկվեք կամ վախենաք խորհրդարանի դռնից դուրս գալ», քանի որ «մենք քծնելու, ոչ էլ արտոնություն ստանալու խնդիր չունենք»:

ԲՀԿ-ական պատգամավոր Ստեփան Մարգարյանի ' Հայաստանից դուրս միջկուսակցական հարաբերությունների ստեղծման առաջարկին ի պատասխան, Ծառուկյանը, հանձնարարելով հատկապես Ջավախքի ուղղությամբ Վրաստանի հետ կապերն ակտիվացնել, ասում է, թե «քանի որ այնտեղ կառավարություն մերոնք են եկել» (՞), «Վրաստանը մեր անմիջական հարեւանն է' մեր կապերը պետք է շատ ամուր լինեն»:

Հետաքրքրական է Վարդան Օսկանյանի մոնտաժված խոսքի այն հատվածը, թե ստեղծված իրավիճակում կուսակցությունը պետք է հաստատի ժողովրդի կողքին լինելու հանձնառությունը, նպաստելով սահմանադրական ճանապարհով նրա իրավունքների իրացմանը: Սա թերեւս միակ վկայությունն է, որ այդ նիստում ներքաղաքական վիճակի մասին խոսք գնացել է, սակայն այդպես էլ չի հասկացվում, թե ի՞նչ է ասել Ծառուկյանն այդ առթիվ իր կուսակիցներին եւ Օսկանյանի այն ասածին, թե ԲՀԿ-ն պետք է «այսօրվանից քաղաքական պայքարի մեջ մտնի' մրցելով տեղական ինքնակառավարման մարմինների ընտրություններում, սկսած Երեւանի ավագանու ընտրություններից, եւ վերջապես ակտիվ ներգրավվածություն ունենա երկրում ընթացող բոլոր գործընթացներին' խորհրդարանական եւ արտախորհրդարանական, մասնակցի ազգային-քաղաքական նոր օրակարգի ձեւավորմանը եւ դրա միջոցով երկրում իրավիճակի փոփոխությանը»:

Մանավանդ երեկ Րաֆֆի Հովհաննիսյանը Իջեւանում ասել է, թե ովքեր ասում են՝ ժողովրդի կողքին են, ժամանակն է դա ցույց տալու: Արդյոք ինչ-որ պահի ԲՀԿ-ն կարձագանքի՞ այս խոսքին, միգուցե դա տեղի կունենա հենց ԲՀԿ ընդհատված նիստի շարունակության ժամանակ: Ի դեպ, մամուլի արտահոսքերով' նիստն ընդհատվել է Երեւանի ավագանու ընտրություններում ԲՀԿ համամասնական ցուցակի վերաբերյալ քննարկումների տաքության պատճառով, որտեղ իբր խոսք է գնացել այն մասին, որ ցուցակը գլխավորի Ռոբերտ Քոչարյանի որդին' Սեդրակ Քոչարյանը: Սակայն ԲՀԿ խմբակցության քարտուղար Նաիրա Զոհրաբյանը հերքել է, թե այդպիսի առաջարկ է քննարկվել:

Ծառուկյանն էլի է կրկնել այն միտքը, որ ասում էր խորհրդարանական ընտրություններից առաջ եւ անմիջապես հետո, թե' «ես պատրաստ եմ կորցնելու ու տուժելու, բայց իմացեք, ձեր այդ հավատը ես չեմ կորցնի, իմ թիմակիցներին թույլ չեմ տա կորցնելու: Ինձ համար կարեւորը ոչ թե քանակն է, այլ որակն է, գաղափարը, ձգտումը, նպատակը եւ գործը, ամենակարեւորը ժողովրդի աչքին նայելն է»:

Հետաքրքրական է, որ ԲՀԿ-ի նախագահին կից առաջարկվել է քաղաքական խորհուրդ ստեղծել, որն ավելի արագ կարձագանքի երկրում տեղի ունեցող քաղաքական եւ այլ գործընթացներին, միգուցե նոր կառույցը կարողանա քաղաքական գործընթացներին իրոք արագ արձագանքել' չսպասելով «կոնյաչնիի» նիստերին:

«Ով չի աշխատում' կարող է դուրս գալ, քանակը որակ չէ ինձ համար», ասել է ԲՀԿ նախագահը: