«168 ժամ». Հակամշակութային «բանավեճ»՝ Ռուբեն Հախվերդյանի և Շուշան Պետրոսյանի կատարմամբ

Հայկական Մամուլ 7 Մարտ, 2013 8:05

Հետընտրակւսն այս օրերին թեժ ամենուր, և հատկապես սոցիալական ցանցերում քննարկումներ են տեղի ունենում, որոնց մասնակցում են ընդդիմադիր և իշխանական թևը ներկայացնող կամ սատարող մշակութային գործիչները: «168 ժամը» գրում է, որ քաղաքական գործիչներն ասպարեզը զիջել են նրանց, մի մասը նախագահի նախկին թեկնածու Րաֆֆի Հովհաննիսյանի հետ հանրահավաքներին ելույթներ է ունենում ընդդեմ իշխանությունների, մի մասը նույն հանրահավաքներում պարզապես ժողովրդի սրտին դիպչող խոսք է ասում՝ ընդհանուր գծերով իր
դժգոհությունն արտահայտելով իշխանությունների վարած քաղաքականությունից և երկրի սոցիալ-տնտեսական ծանր վիճակից, մի մասը հայհոյում է իշխանություններին, որոնց հետ ժամանակին «ախպերություն» էր, մի մասը հեռուստաեթերից «դոշ է տալիս» իշխանությունների համար և երկրում ստեղծված ծանր վիճակի մեջ մեղադրում ժողովրդին,մի մասը համարժեք հայհոյանքով պատասխանում է իշխանությունների հասցեին հայհոյանք հնչեցնողներին... Մի խոսքով՝ հետաքրքիր և գրոտեսկային ժամանակներ են:

Իհարկե, այս ամբողջի մեջ հատկապես վերջին օրերին առանձնացել են հեղինակային երգերի կատարող, երգահան Ռուբեն Հախվերդյանը և երգչուհի, Հայաստանի հանրապետական կուսակցության (ՀՀԿ) անդամ, Աժ պատգամավոր Շուշան Պետրոսյանը: Երգչուհու կողմից հնչեցված կարծիքների կապակցությամբ մեծ հարձակում էր սկսվել նրա նկատմամբ: Ընդ որում, շատ հաճախ ոչ թե քննարկում-քննադատում էին նրա այս կամ այն տեսակետը, այլ անձնական բնույթի վիրավորանքներ էին հասցվում:

Ի դեպ, Շուշան Պետրոսյանը և Ռուբեն Հախվերդյանը հարևաններ են: Բառի բուն իմաստով: Նրանց ՀՀ երկրորդ նախագահ Ռոբերտ Քոչարյանի օրոք նույն շենքում բնակարաններ էին տրվել: Երեկ ասուլիսում Ռուբեն Հախվերդյանն, ի պատասխան այն հարցի, որ ՀՀ բոլոր երեք նախագահների օրոք էլ նա լավագույնս օգտվել է իշխանական բարիքներից, հիմա բարոյական ի՞նչ իրավունքով է նրանց քննադատում, պատասխանել է, որ Սերժ Սարգսյանը մեկ անգամ է իրեն ֆինանսական օգնություն հատկացրել՝ մանկական երգերի սկավառակի
ձայնագրման համար: Լևոն Տեր-Պետրոսյանի օրոք ֆրանսիայում իր վիրահատության մասին ասել է. «Տեր-Պետրոսյանի իշխանության օրոք Հայաստանում գործել է օրենք, ըստ որի՝ հայտնի որևէ արվեստագետ Ֆրանսիայում կարող էր բուժվել՝ որպես ֆրանսիական քաղաքացի, այսինքն՝ անվճար: Ես բուժվել եմ ձրի, ինչքա՞ն կարող եմ այս ամենի մասին ասել»: Ապա թե՝ «Իսկ Ռոբերտ Քոչարյանն ինձ երեք սենյականոց բնակարանի փոխարեն՝ չորս սենյականոց բնակարան է տվել... Ես իմ շնորհակալությունը հայտնել եմ: Եթե տալիս են ու տալիս են տեղին, ինչո՞ւ չպետք է վերցնես, բայց եթե մարդ սխալ է անում, դիտողություն չանե՞ս, որ տղա՛ ջան, ճիշտ չես անում: Օրինակ՝ Մարտի 1-ը կուլ տալո՞ւ բան էր, դուք կլռեի՞ք, թե՞ կխոսեիք»:

Վերջինս նաև որոշ հայտարարություններ է արել Շուշան Պետրոսյանի հասցեին. «Շուշան Պետրոսյանը վերջին շրջանում Պաշտպանության նախարարությունից լավ փողեր է ստանում, բա ինչի՞ չպիտի իշխանությանը գովերգի»:

«168 ժամի» թղթակցի հետ հարցազրույցում Շուշան Պետրոսյանը, կարելի է ասել՝ պատասխանել է իր հարևան Ռուբեն Հախվերդյանին: «Ես երբևէ ինձ թո՞ւյլ եմ տվել հաշվել Ռուբեն Հախվերդյանի փողերը, երբ գնում էր այս կամ այն նախարարի մոտ ու գումար էր մուրում, և հետո գալիս-ասում էր՝ սրան քցեցի, նրան քցեցի՝ կոնկրետ նախարարների անուններ տալով: Ես բազմիցս դրան ներկա եմ եղել, բայց ինձ թո՞ւյլ եմ տվել խոսել այդ մասին: Թող Ռուբեն Հախվերդյանը մտածի, թե ի՞նչ պատասխան պիտի տա Արցախի իմ զինվոր-ընկերներին իր հայտարարության համար, որը չեմ ցանկանում բարձրաձայնել հիմա, որովհետև ես պետականորեն եմ մտածում»,- ասել է երգչուհին: