«Ազգ». «Մահվան էսկադրոն» ադրբեջանական բանակո՞ւմ

Ադրբեջանական զինված ուժերում արձանագրվել է հերթական մարդկային կորուստը. «հանկարծամահ է եղել շարքային Էլման Աբիեւը»: Ըստ vesti.az-ի, Աբիեւը «մարտական հերթապահության մեջ էր բարձրլեռնային տեղանքում»: Մեկ ոչ լրիվ շաբաթվա մեջ դա ադրբեջանական բանակում զինվորի «հանկարծակի» մահվան երրորդ դեպքն է:

Բայց' ոչ միայն դա: Հունվարից ի վեր դա նաեւ Ադրբեջանի ԶՈՒ Շամքորի կորպուսում երրորդ պատահարն է: Հունվարի 13-ին «մահացել էր» այդ զորամիավորման շարքային Ջեյհուն Իբադովը: Դատաբժշկական փորձաքննությունն «արձանագրել էր սրտային սուր անբավարարություն», սակայն զինվորի հարազատներին հաջողվել էր դիահերձարանում լուսանկարել եւ տեսանկարահանել նրա դիակը: Նույն օրն իսկ այդ նյութերը հայտնվել էին համացանցում, ինչին հետեւել էր Բաքվի կենտրոնում անցկացված «Բանակում «ոչ» զինվորի մահվանը» ակցիան:

Մարտի 2-ին Շամքորի կորպուսում «մահացել էր» շարքային Սեյմուր Ալլահվերդիեւը, որի թաղումը Գյոկչայի շրջանի Քյուրդամիշ գյուղում վերածվել էր սկանդալի. զինվորի ծնողները պահանջել էին «բացել ցինկե դագաղը», ինչին ընդդիմացել էր ոստիկանությունը: Ծնողներն սպառնացել էին, որ թույլ չեն տա հողին հանձնել իրենց որդուն, «մինչեւ լրացուցիչ դատաբժշկական փորձաքննություն չիրականացվի»:

Ադրբեջանի զինվորական դատախազությունն ստիպված էր եղել Քյուրդամիշ գործուղել դատաբժշկի: Օրվա երկրորդ կեսին զինվորի հուղարկավորությանը մասնակցելու էր գնացել Շամքորի կորպուսի հրամանատար Ռովշան Աքպերովը, եւ «միջադեպը հարթվել էր»: Եվ ահա նույն զորամիավորման ստորաբաժանումներից մեկում արձանագրվել է շարքային զինվորի հերթական մահը:

Շարքային Ջեյհուն Իբադովի «մահվան» առթիվ հանրային քննարկումների ամենաթեժ օրերին Ադրբեջանի Միլլի մեջլիսի պատգամավոր Գուդրեթ Հասանգուլիեւը հիշեցրել էր ավելի վաղ նույն զորամիավորման 5 զինվորների մահվան փաստը, երբ, սակայն «պաշտպանության նախարարի բարեկամ' կորպուսի հրամանատարն ընդամենը ազատվել է պաշտոնից, մինչդեռ այս դեպքում ականատես ենք հանրային ավելի սուր արձագանքի, եւ նույնիսկ իշխանական լրատվամիջոցներն են բուռն քննարկումներ ծավալել, իսկ կորպուսի հրամանատար Ռովշան Աքպերովը պատժվել է անհապաղ»:

Հասանգուլիեւի կարծիքով, դա պայմանավորված է նրանով, որ «Աքպերովը հայտնի է որպես ամենահեռանկարային սպաներից մեկը, ղարաբաղյան պատերազմի մասնակից է եւ համարվում է ՊՆ ամենաբարձր պաշտոնի հավակնորդ»: Համաձայնենք, որ Միլլի մեջլիսի պատգամավորը չափազանց թափանցիկ ակնարկ է արել, թե ինչո՞ւ դժբախտ պատահարներ ավելի շատ տեղի են ունենում Շամքորի կորպուսում:

Ռովշան Աքպերովը ծնվել է Բաքվում 1965-ին: Ռազմական կրթություն ստացել է նախ Ջամշիդ Նախիջեւանսկու անվան ուսումնարանում, ապա' Կիեւում, ծառայել է Աֆղանստանում: Ադրբեջանական բանակում զբաղեցրել է տարբեր հրամանատարական պաշտոններ: 1994-ի հոկտեմբերի 5-ին Հեյդար Ալիեւի հրամանագրով արժանացել է Ադրբեջանի ազգային հերոսի կոչման: Ադրբեջանական բանակի չափանիշներով, ինչպես տեսնում ենք, Աքպերովն ունի ներկայանալի կենսագրություն: Եվ, որպես «համազգային առաջնորդից» գնահատված, հնարավոր է' կարող է հավակնել պաշտպանության նախարարի պաշտոնին: Թեեւ քիչ չեն նաեւ նրա մասին տարածվող «կոմպրոմատները»: Մասնավորապես նշվում է, որ Աքպերովը «խոշոր բիզնես ունի Ուկրաինայում»: Կարծիք կա, որ նախկինում նա այդ երկրում «մասնակցել է քրեական «ռազբորկա»-ների' կապված բիզնեսի հետ»: Աքպերովին նույնիսկ մեղադրում են Ուկրաինայում իր ադրբեջանցի «բիզնես մրցակիցների սպանության» մեջ:

2013-ի սկզբից Աքպերովի հրամանատարության զորամիավորման երեք զինվորի «մահվան» փաստը համադրելով Միլլի մեջլիսի պատգամավոր Գուդրեթ Հասանգուլի վերոնշյալ թափանցիկ ակնարկի հետ' կարելի է եզրակացնել, որ խնդիրը «օրինաչափության» հարթությունում է: Այն է' դրանք կազմակերպված սպանություններ են, որպեսզի Աքպերովի ծառայողական առաջխացումը խոչընդոտվի:

Ո՞ւմ միջոցով է դա արվում: Ո՞վ է ուղղորդում հանցագործությունները: Պաշտպանության նախարար Աբիե՞ւը, թե՞ կա նաեւ շահագրգիռ երրորդ անձ: Պաշտպանության նախարարի հավանական թեկնածու է դիտվում նաեւ Իլհամ Ալիեւի գլխավոր ռազմական խորհրդատու Վահիդ Ալիեւը: Ըստ էության, ադրբեջանական բանակում գործում են «մահվան էսկադրոն»-ներ, որոնք որոշակի ներքաղաքական իրավիճակի համար պատրաստ են «հանկարծամահ» անել շարքային զինվորների:

Սա արդեն նողկալի է: «Բանակում «ոչ» զինվորի մահվանը» նախաձեռնող խումբը Բաքվի գործադիր իշխանությանը ծանուցել է մարտի 10-ին անցկացվելիք բողոքի ակցիայի մասին: Գուցե այդ օրը ինչ-որ բան կբացահայտվի՞...