«168 Ժամ». Ինչպե՞ս իշխանության համար պայքարը դուրս բերել արատավոր շրջանից

Աժ նախկին նախագահ, քաղաքական գիտությունների դոկտոր Տիգրան Թորոսյանն անդրադարձել է քաղաքական համակարգի
արատավոր երևույթներին, մասնավորապես բազմակուսակցական համակարգի փլուզմանը և կենսունակ ու նոր համակարգի հնարավոր կայացմանը:

«Իր գլխավորած կուսակցությունում լուրջ վերանայումների իրականացման, վերոհիշյալ մարտահրավերներն ընկալող ու դրանց
դիմակայելու ունակ մարդկանց առանցքային դերերը վստահելու, նոր, կենսունակ բազմակուսակցական համակարգի ձևավորման
անհրաժեշտությունը կարևորելու և այդ ուղղությամբ արդյունավետ գործունեություն ծավալելու դեպքում Սերժ Սարգսյանի համար եզակի հնարավորություն կստեղծվի՝ ցույց տալու համար, որ հետխորհրդային տրանսֆորմացիայի երկրներում ևս հնարավոր է ունենալ մինչ այժմ որևէ մեկի համար անհասանելի արդյունքներ՝ 

1. նախագահի գլխավորած կուսակցությունը ոչ թե կվերածվի պարզունակ «իշխանության կուսակցության» և, ի վերջո, կհայտնվի քաղաքական կյանքի լուսանցքում, այլ կդառնա բազմակուսակցական համակարգի ձևավորման ու կայացման կարևոր խթանիչ ուժ,

2. հետագա հնգամյա պաշտոնավարման ժամկետն ավարտելուց հետո նախագահը կհեռանա դրական ակորդով՝ երկրի զարգացումն ապահովող ամուր և անշրջելի քաղաքական հիմքի ստեղծումից ու դրա շնորհիվ երկրում որակական բարելավումներ իրականացնելուց հետո:

Հանուն նոր, կենսունակ բազմակուսակցական համակարգի կայացման իշխանություն-ընդդիմություն սահմանադրական պայքար-մրցակցությունն է այն միակ գաղափարը, որի իրագործումը հնարավորություն կտա մոբիլիզացնել երկրում առկա կարող ուժերը և իշխանության համար պայքարը դուրս բերել այն արատավոր շրջանից, որում, կամա թե ակամա, նախկինում պարբերաբար հայտնվել են Հայաստանի իշխանությունն ու ընդդիմությունը»,- հատուկ «168 ժամի» համար գրված հոդվածում նշել է Տիգրան
Թորոսյանը: