Պետք է միշտ պատրաստ լինել

Այս օրերին ՀՀ ԱԻ նախարարությունում անցկացվում էին «Երկրաշարժ` երբ, որտեղ, ինչու։ Դրա առանձնահատկությունները Հայաստանում։ Երկրաշարժից պաշտպանությունը տանը և դպրոցներում» թեմայով լսումներ։ Դրանք կազմակերպել էր ՀՀ ԱԻՆ «Սեյսմիկ պաշտպանության ծառայություն» գործակալությունը։ Քննարկումը վարում էր գործակալության պետի տեղակալ Աշխեն Թովմասյանը։

Ընդհանուր առմամբ՝ վերը նշված թեմաներով լսումներին մասնակցել է Երևանի քաղաքապետարանի ենթակայության տակ գտնվող հիմնական, ինչպես նաև ՀՀ կրթության և գիտության նախարարությանը ենթակա 160 դպրոցների ավելի քան 230 աշխատակից։

Լսումներին վերջին՝ յոթերորդ օրը հենց բուռն քննարկում սկզբից ծավալվեց այնպիսի արդի խնդիրների շուրջ, ինչպիսիք են դպրոցներում երկրաշարժից պաշտպանության կազմակերպումը, դրա համար անհրաժեշտ հնարավորությունները և այլն։ Այսօրինակ միջոցառումները հնարավորություն են տալիս նաև բարձրացնել դպրոցների անվտանգության հետ կապված տարբեր խնդիրներ' շենքերում տարհանման ելքերի ապահովում, հարակից բաց, ազատ տարածքների բացակայություն և այլն։

Հանդիպման ընթացքում զուգահեռներ անցկացվեցին Ճապոնիայում գրանցված վերջին ամենաուժեղ երկրաշարժերի և Սպիտակի երկրաշարժի շուրջ, ինչպես նաև ներկայացվեց Ճապոնիայի փորձը։ Ուսուցիչները կիսվեցին նաև իրենց փորձով' վերլուծելով երկրաշարժի ժամանակ սեփական զգացողությունները և վարքագծում թույլ տված սխալները։

«ՍՊԾ» գործակալության սեյսմիկ ռիսկի նվազեցման վարչության գլխավոր մասնագետ Հասմիկ Կիրակոսյանը պատմեց երկրաշարժի վերաբերյալ անվտանգության վարքականոնների մասին։ Ա. Թովմասյանը, ներկայացնելով երկրաշարժի առանձնահատկությունները ՀՀ տարածքում, նշեց, որ այսպիսով ՀՀ ԱԻՆ սեյսմիկ պաշտպանության ծառայությունը փորձում է դպրոցների ուսուցիչներին փոխանցել կուտակված փորձը։ Սակայն իրավիճակները կարող են շատ տարբեր լինել, ուստի՝ պետք է միշտ պատրաստ լինել։

Լսումներին ներկա բոլոր մանկավարժներն էլ բարձր են գնահատել նման հանդիպումների նշանակությունը՝ ընդգծելով, որ դրանք կարևոր են ուսուցիչների իրազեկման և պատրաստվածության բարձրացման համար։ Հանդիպումների մասնակիցներն առաջարկել են ավելի հաճախ կազմակերպել նման միջոցառումներ, դասընթացներ անցկացնել նաև դպրոցներում։