ԿԸՀ-ն՝ Վարդան Սեդրակյանի անօրինական կալանավորման մասին

Երեկ Վարդան Սեդրակյանի գործով զբաղվող «Սիրունյան» իրավաբանական գրասենյակը հայտարարություն տարածեց այն մասին, որ Երևան քաղաքի Կենտրոն եւ Նորք-Մարաշ վարչական շրջանների ընդհանուր իրավասության դատարանի՝ 2013 թվականի մարտի 5-ի որոշմամբ  նախագահի նախկին թեկնածու Վարդան Սեդրակյանի նկատմամբ որպես խափանման միջոց ընտրված 2 ամիս ժամկետով կալանքն անօրինական է:

Վկայակոչելով ՀՀ ԸՕ 87 հոդվածի 6-րդ մասը՝ հայտարարությունում նշվում էր, որ հանրապետության նախագահի թեկնածուն, ընտրված նախագահը մինչև հանրապետության նախագահի պաշտոնը ստանձնելը կարող է ձերբակալվել կամ կալանավորվել կամ նրա նկատմամբ դատական պատասխանատվության ենթարկելու հարց հարուցել միայն Կենտրոնական ընտրական հանձնաժողովի համաձայնությամբ: 

Lurer.com-ի թղթակցի հետ զրույցում ԿԸՀ մամլո խոսնակ Հերմինե Հարությունյանն ասաց, որ կապված Վարդան Սեդրակյանի կալանավորման հետ՝ ԿԸՀ-ում ոչ մի քննարկում առհասարակ չի եղել. «Այդ հարցի կապակցությամբ ոչ մի քննարկում չի եղել և ոչ մի որոշում ԿԸՀ-ն չի կայացրել»,-ասաց խոսնակը: Դիտարկմանը, թե ԿԸՀ-ի որոշման բացակայության պարագայում կալանավորումն անօրինական է, խոսնակը մեկնաբանություն տալուց ձեռնպահ մնաց, կրկնելով, որ ԿԸՀ-ն Վարդան Սեդրակյանի կալանավորման մասին որոշում չունի:

Lurer.com-ի թղթակիցը նույն հարցի շուրջ զանգահարեց նաև ԱԱԾ մամլո խոսնակ Արծվին Բաղրամյանին, ով կտրականապես խուսափեց այդ հարցի շուրջ մեկնաբանություն տալ. մենք մեր պաշտոնական հայտարարությունը տարածել ենք, ես այդ հարցի շուրջ ոչ մի մեկնաբանություն չեմ տալիս, զանգե՛ք դատարան»: