Ի՞նչ նվեր են ստանալու նախարարների կանայք

Կանանց տոնին՝ Մարտի 8-ին, հաշված ժամեր են մնացել: Կանայք սրտատրոփ սպասում են նվերների, իսկ տղամարդիկ էլ փորձում են անել ամեն բան, որպեսզի պատրաստած նվերը համապատասխանի թե իրենց գրպանին և թե կնոջ ճաշակին:

Թե ինչ նվերներ են նախապատրաստել իրենց կանանց նախարարները, լրագրողներն այսօր փորձեցին պարզել հենց նրանցից:

ՀՀ արդարադատության նախարար Հրայր Թովմասյանը նվերների առումով իրեն սենտիմենտալ և հնարամիտ չի համարում: «Ավելի շատ ստանդարտ նվերներ եմ անում»,- նշեց նախարարը:

Ի դեպ, նախարարն իր կնոջը դիմում է «մամի», քանի որ դա իր կնոջ սիրած արտահայտությունն է:

Աշխատանքի և սոցիալական հարցերի նախարար Արտեմ Ասատրյանը ևս դեռ չգիտի, թե ինչ է նվիրելու կնոջը:

«Սովորաբար ծաղիկներ եմ գնում, հավանաբար վաղն էլ ծաղիկներով կշնորհավորեմ»,- ասաց նա:

Իսկ Բնապահպանության նախարար Արամ Հարությունյանը նշեց, որ տոնը նշում է ընտանիքում: Շնորհավորում է կնոջը, մորը, աղջիկներին:

«Առաջին հերթին ծաղիկներ եմ նվիրում: Հավանաբար վաղն էլ փոքրիկ միջոցառում կանցկացնենք տանը և ամենալավ նվերը կլինի այն, որ միասին կանցկացնենք:

Կնոջ դերը նա շատ է կարևորում. «Շատ կարևոր է, որ մեր կանայք մեզ աջակից են և այդ ջերմությունը զգում ենք»,- ասաց նախարարը:

Slaq.am