Էմմի. մարտի 8-ն ինձ մոտ ասոցացվում է ձնծաղիկների եւ մանուշակների հետ

Մարտի 8-ը կանանց միջազգային օրն է: Այս տոնը նշում են բազմաթիվ երկրներում, այդ թվում՝ Հայաստանում: Իսկ ինչպե՞ս են նշում մարտի 8-ը հայկական շոու-բիզնեսի ներկայացուցիչները, փորձել է պարզել NEWS.am STYLE-ի թղթակիցը:

Գիսանե Պալյան, կոմպոզիտոր

«Կարծում եմ՝ մարդիկ երբեք չպետք է մոռանան իրենց մտերիմներին: Եվ կարեւոր չէ, տոն կա՞, թե՝ ոչ: Եթե մարդը քեզ համար թանկ է, նրա հանդեպ միշտ ուշադիր կլինես: Ինչ վերաբերում է նվերներին, կարող եմ ասել, որ դրանք նվիրում եմ մորս, սկեսուրիս եւ, իհարկե, աղջիկներիս»:

Էմմի, երգչուհի

«Ամեն տարի տոնը տարբեր կերպ եմ նշում: Դա կախված է նրանից, այդ օրը իմ մասնակցությամբ միջոցառում կա՞, թե՝ ոչ: Նվեր մատուցում եմ միայն մորս: Դեռ մանուկ տարիքից մարտի 8-ն ինձ մոտ ասոցացվում է ձնծաղիկների եւ մանուշակների հետ: Շատ հաճելի է ծաղիկներ եւ շնորհավորանքներ ստանալ»:

Լանա Խաչատրյան, երգչուհի

«Սիրում եմ այս տոնը: Այն ինձ համար շատ ընտանեկան է: Նվերներ եմ պատրաստում մորս եւ տատիկներիս համար: Շատ կարեւոր է, որպեսզի այդ օրը տատիկներն իրենց միայնակ չզգան: Այդ պատճառով նրանց հանդեպ առավելագույն ուշադրություն պետք է ցուցաբերել: Ինչ վերաբերում է տղամարդկանց, կարող եմ ասել, որ նրանք պետք է իրենց սիրելիների հանդեպ ուշադիր լինեն միշտ, այլ ոչ միայն այդ օրը»:

Անի Քոչար, «YES!» ամսագրի տնօրեն

«Ես մարդկանց մեծ ցուցակ ունեմ, որոնց համար նվերներ եմ պատրաստում: Իհարկե, այդ ցուցակի առաջին տեղում մայրս եւ քույրերս են: Նաեւ սիրում եմ նվերներ ստանալ, չէ՞ որ դա շատ հաճելի է: Ինձ համար նվերներ փնտրելն ու գնելը մի ամբողջ արարողություն է: Նախկինում, մինչեւ ամուսնությունը, այդ տոնը նշում էի քույրերիս եւ ընկերուհիներիս հետ: Բայց հիմա՝ ամուսնուս հետ, ով այդ օրն ինձ համար իսկական տոն է դարձնում»: