Էպոսը չես էլ կարդացել. Իսագուլյանը Սեդրակյանին աշխատանքի չի ընդունել

«Իրավունքը» էպոսագետ Վարդան Սեդրակյանի մասին զրուցել է ԱԺ-ում ՀՀ նախագահի նախկին ներկայացուցիչ, «Ազգային անվտանգություն» կուսակցության ղեկավար Գառնիկ Իսագուլյանի հետ, ով ժամանակին անձնապես շփվել է էպոսագետի հետ: Վերջինս նշել է, որ իրենց միջև շփումներ չեն եղել: Բայց, երբ 2004-ին բացում էին նախագահի աշխատակազմին առընթեր Քաղաքական հետազոտությունների ինստիտուտ, և քանի որ Իսագուլյանն էր խորհրդի նախագահը, հայտարարություն են տարածել, որ բոլոր մասնագետները՝ քաղաքագետներ և այլք, կարող են դիմել աշխատանքի ընդունվելու համար:

«Այդ բոլորի մեջ նաև դիմել էր Վարդան Սեդրակյանը: Մարդը ներկայացել էր որպես էպոսագետ, բնականաբար, պետք է անպայման ընդունեի ու լսեի նրան: Երբ զրուցեցինք, ասացի. «Լավ, Դուք Ձեզ հայտարարում եք էպոսագետ, գոնե էպոսի վերաբերյալ որևէ գիտական աշխատություն ունե՞ք գրած»: Ասաց՝ ոչ: Ես էլ հարցրեցի, թե «Դուք ինքներդ ինչ-որ վերլուծություններ, գրառումներ ունե՞ք»: Եվ կրկին Սեդրակյանն ասաց ոչ, ու նշեց, թե ինքը ուղղակի էպոսը շատ լավ կարդում է ու հասկանում, որ այն գաղտնագրեր ունի իր մեջ: Խնդրեցի, որ այն, ինչ պետք է բանավոր ասեր, գնար, հանձներ թղթին: Երկու շաբաթ հետո եկավ առանց որևէ թղթի, էլի բանավոր զրուցելու: Ես էլ ասացի. «Ցավդ տանեմ, արդեն զգում եմ, որ էպոսն էլ լավ չգիտես, հաստատ էպոսը չես էլ կարդացել»,- ասել է Իսագուլյանը: